जुना धामणगावात 32 वर्षीय महिलेविषयी नेमके काय घडले? वाचा...

धामणगावरेल्वे : जुना धामणगाव येथील वैभव लक्ष्मीनगरात एका 32 वर्षीय महिलेचा धारदार शस्त्राने भोसकून खून झाला. त्यात महिलेचा मुलगाही गंभीर जखमी झाला. त्याच्यावर नागपुरात उपचार सुरू आहेत. मात्र, नेमका कशामुळे महिलेचा खून करण्यात आला हे कळू शकले नाही.

गीता रेवन अंबाडरे (32, रा. लालबरा, जि. बालाघाट) ही आठ वर्षांपासून वैभवलक्ष्मीनगरात राहून शेळीपालनासह मोलमजुरी करीत होती. बुधवारी (ता.29) मध्यरात्रीनंतर एकच्या सुमारास अज्ञात व्यक्तीने वार करून गीता यांचा खून केला. अकरा वर्षीय रवींद्र या घटनेमुळे घाबरला. त्यालाही जबर मारहाण झाली. मारहाणीत महिलेच्या डोक्‍यावर हाताला आणि पायाला गंभीर जखमा झाल्या. तिला उपचारार्थ यवतमाळ येथील रुग्णालयात नेत असताना वाटेतच तिचा मृत्यू झाला.

वाचा - गोठ्याच्या कारणावरून व्हायचा वाद, एक दिवस संपूर्ण कुटुंबच आले रस्त्यावर आणि...

मृत महिलेची बहीण प्रमिला सुरेश सोनवणे यांच्या तक्रारीवरून दत्तापूर पोलिसांनी अनोळखी व्यक्तीविरुद्ध खुनाचा गुन्हा दाखल केला. ठाणेदार ब्रह्मदेव शेळके यांचे पथक तपास करीत आहे. अतिरिक्त जिल्हा पोलिस अधीक्षक श्‍याम घुगे, पोलिस उपअधीक्षक सोमनाथ तांबे, गुन्हे अन्वेषण शाखेचे आनंद पिदूरकर यांनी भेट दिली व घटनेची माहिती दिली. पोलिस दुसऱ्याही दिवशी घटनास्थळी तळ ठोकून होते.

दोन स्मार्टफोन सापडले
पोलिसांना घटनास्थळी रात्रीला एक व सकाळी एक, असे दोन स्मार्टफोन सापडले. यावरून पोलिसांनी कॉलडिटेल्सची तपासणी सुरू केली.

आणखी वाचा - कसा देताहेत गर्भवती महिला, प्रसूत माता कोरोनाशी लढा, जाणून घ्या...

कुत्राही झाला जखमी
महिलेकडे एक पाळीव कुत्रा होता. गुरुवारला  सकाळी तो जखमी अवस्थेत झुडूपांमध्ये बसलेला दिसला. याप्रकरणी तपास केला असता रात्री हत्याकांड सुरू असताना भुंकल्याचा आवाज होऊ नये म्हणून हल्लेखोरांनी त्यालाही जखमी केल्याची शक्‍यता आहे.

संपादन - नरेश शेळके