यशोगाथा! बोटांमधून पळणाऱ्या रांगोळीचा अमरावती ते पुणे प्रवास; ओळख निर्मितीसह मिळाला रोजगार

तिवसा (जि. अमरावती) : शहराला लागूनच असलेल्या सुरवाडी येथील वैशाली शिंदे या तरुणीने विविध सामाजिक संदेश देणाऱ्या रांगोळी काढून स्वतःची वेगळी ओळख निर्माण केली आहे. या कलेच्या माध्यमातून रोजगार उभा केला आहे. तिने रांगोळी रेखाटून जनजागृती करीत तालुक्‍यात प्रथम मानदेखील मिळविला आहे. त्यामुळे तिचे सर्वच कौतुक होत आहे.

अनेकांना लहानपणापासूनच रांगोळीच्या विविध रंगांचे आकर्षण असते. मात्र, या रंगांच्या माध्यमातून आपल्या कल्पनेला गरुडझेप देणे सर्वांना जमत नाही. स्वतःच्या कलागुणात असलेला छंद जोपासला तर तोच छंद एक वेगळी ओळख व रोजगार देतो, हेच तिने प्रत्यक्षात उतरवून दाखवले. तिच्या बोटातून पळणाऱ्या रांगोळीतून नवनवीन समाज जनजागृती तसेच विविध संदेश देत असते. त्यामुळे तिच्या रांगोळीचे कौतुक होत आहे.

अधिक वाचा - मातृत्व अनुभवण्यापूर्वीच झाला बाळाचा मृत्यू, महिलेचं कृत्य पाहून उपस्थितांचेही पाणावले डोळे

वैशालीला लहानपणी रांगोळीच्या रंगांचे आकर्षण होते. त्यासोबतच आपली कल्पना रांगोळीच्या माध्यमातून जमिनीवर रेखाटण्याची जिद्द होती. तिने प्रथम प्राथमिक शाळेत रांगोळी स्पर्धेत सहभाग घेऊन प्रथम पुरस्कार पटकविला होता. तेव्हापासूनच तिने आपला छंद जोपासत रांगोळीच्या रंगातून आपली चांगली ओळख निर्माण केली व रोजगारसुद्धा निर्माण केला.

शासनातर्फे सन्मान

तिवसा शहरातील यादव देशमुख महाविद्यालयाच्या शिक्षकांचे वैशालीला मोलाचे मार्गदर्शन मिळाले. २०१५ मतदान सप्ताह कार्यक्रमानिमित्त काढलेल्या मतदान जनजागृती रांगोळी रेखटनातून तालुक्‍यातून प्रथम येण्याचा मान वैशालीनी मिळविला होता. याकरिता शासनातर्फे तिचा सन्मानसुद्धा करण्यात आला होता.

पुण्यात होणाऱ्या राज्यस्तरीय स्पर्धेत सहभाग

रांगोळी रेखाटून आपला छंद वैशालीने ज्याप्रमाणे जोपासला त्याच जोरावर तिने पुण्यात झालेल्या राज्यस्तरीय रांगोळी स्पर्धेत अमरावती जिल्ह्याचे प्रतिनिधित्व केले. अमरावती येथील वैष्णवी काळे हीदेखील सहभागी झाली होती. वैशालीने अतुल्य भारत, गजानन महाराज, शिवाजी जयंती, महाशिवरात्री अशा विविध सणानिमित्त मोठ्या रांगोळ्या रेखाटल्या आहेत.

जाणून घ्या - काळजात धस्स करणारी हिंगणघाटची घटना; काय घडले होते अंकितासोबत गतवर्षी ३ फेब्रुवारीला

रोजगार मिळत आहे
लहानपणापासून रांगोळीची आवड आहे. शिकत असताना विविध स्पर्धेत सहभाग घेऊन आशा मिळाली. मी नवनवीन रांगोळी रेखाटून समाज जनजागृती करण्याचा प्रयत्न केला. कोरोनाच्या काळात याच रंगांमुळे मी माझ्या कुटुंबाला आधार म्हणून हातभार लावला. आज मला चांगल्याप्रकारे यामधून रोजगार मिळत आहे. यासाठी मला तिवसा येथील यादव देशमुख महाविद्यालयातील शिक्षकांचे मार्गदर्शन प्राप्त झाले.
- वैशाली शिंदे,
सुरवाडी, ता. तिवसा, जि. अमरावती