Nimisha Priya Execution ‘postponed’: येमेनमधलं निमिषा प्रिया प्रकरण नेमकं काय आहे? | sakal News

Nimisha Priya Case: परदेशात जाऊन ऐषआरामी आयुष्य जगण्याचं स्वप्न अनेकांचं असतं आणि केरळमधील एका गरीब घरात जन्मलेल्या निमिषा प्रियाचंही तसंच एक स्वप्न होतं. तिची आई मोलकरीण होती, घरची परिस्थिती हलाखीची. या गरिबीतून मार्ग काढण्यासाठी २००८ साली, अवघ्या १९ व्या वर्षी, निमिषा येमेनला गेली. सरकारी रुग्णालयात नर्स म्हणून तिला नोकरी मिळाली आणि वाटलं सगळं काही आता सुरळीत होईल. पण पुढील काही वर्षांत तिचं आयुष्य एका वळणावर येऊन थांबलं.. इतकं की आज ती येमेनच्या तुरुंगात फाशीची शिक्षा भोगतेय. तिच्यावर एका येमेनी नागरिकाच्या खुनाचा आरोप आहे.

या प्रकरणात येमेनच्या सर्वोच्च न्यायालयाने तिला फाशीची शिक्षा सुनावली आणि ती १६ जुलै २०२५ रोजी दिली जाणार होती. मात्र, अखेरच्या क्षणी ही फाशी तूर्तास टळली आहे. भारत सरकारच्या आणि मुत्सद्देगिरीच्या प्रयत्नामुळे हे शक्य झालं. तरी, ही शिक्षा कशी टळली? पुढे निमिषासमोर काय पर्याय आहेत? खरंतर भारतीय मुत्सद्देगिरीमुळे चर्चेत असणारं निमिषा प्रियाचं प्रकरण नेमकं काय? तिच्यावर एका येमेनी नागरिकाच्या हत्येचा आरोप असतानाही तिला वाचवण्याचा प्रयत्न का होतोय? हेचे सारंकाही समजून घेणार आहोत या व्हिडिओतून..