Beed News: Gevrai Chhatrappati Multistate खासगी बँकेसमोर ठेवीदारानं संपवलं जीवन

बीड जिल्ह्यातील गेवराई तालुक्यातील खळेगाव येथून एक अत्यंत धक्कादायक घटना समोर आली आहे. ठेवीदार सुरेश आत्माराम जाधव (वय ५५) यांनी छत्रपती मल्टीस्टेट बँकेच्या मुख्य गेटला गळफास घेऊन आत्महत्या केली. या प्रकारामुळे परिसरात प्रचंड खळबळ उडाली आहे. सुरेश जाधव यांनी छत्रपती मल्टीस्टेट बँकेत ११ लाख रुपये आणि ज्ञानराधा मल्टीस्टेटमध्ये ५ लाख रुपये जमा केले होते. सध्या त्यांच्या मुलीचं लग्न ठरलेलं होतं आणि त्यासाठी त्यांना मोठ्या प्रमाणात पैशांची गरज होती. मात्र, बँकेकडून सातत्याने वेळा दिल्या गेल्या, पैसे मिळाले नाहीत. सुरेश जाधव यांनी अनेक वेळा बँकेच्या फेऱ्या मारल्या, विनंती केली, पण त्यांच्या मागण्यांकडे दुर्लक्षच करण्यात आलं. या मानसिक त्रासातून आणि आर्थिक ताणातून त्यांनी अखेर टोकाचं पाऊल उचलत बँकेच्या गेटवरच गळफास घेत आत्महत्या केली.