Samruddhi Mahamarg Accident: शेगावहून दुर्गा देवीची मूर्ती घेऊन जाताना भीषण अपघाताच्या आधीचे

समृद्धी महामार्गावर अमरावती जिल्ह्यातील धामणगाव रेल्वेजवळ चॅनल ९७ वर एक अत्यंत भीषण रस्ते अपघात घडला आहे. शेगावहून दुर्गादेवीची मूर्ती घेऊन वर्ध्याकडे जाणाऱ्या एका बोलेरो टेम्पो पिकअपला भरधाव ट्रकने जोरदार धडक दिली. या हृदयद्रावक अपघातात ७ भक्तांचा जागीच मृत्यू झाला असून २५ जण गंभीर जखमी झाले आहेत. अपघाताची माहिती मिळताच स्थानिक प्रशासन आणि महामार्ग पोलिसांनी घटनास्थळी धाव घेत मदतकार्य सुरू केले. जखमींना सर्वप्रथम धामणगाव ग्रामीण रुग्णालयात उपचारासाठी दाखल करण्यात आले, मात्र बहुतेकांची प्रकृती चिंताजनक असल्याने त्यांना तातडीने वर्धा येथील वैद्यकीय महाविद्यालयात हलवण्यात आले आहे. अपघातापूर्वीचे काही व्हिडिओही आता समोर आले असून, नवरात्रोत्सवाच्या काळात घडलेल्या या घटनेमुळे वर्धा आणि अमरावती परिसरात शोककळा पसरली आहे.