Mumbra Railway Station news: एक वळण अन् तो झटका, ८ प्रवाशांचा जीव घेतला, मुंब्रा स्टेशनवर काय घडलं ?

आज सकाळची ९.३० ची वेळ मुंबईला कामासाठी निघालेल्या त्या सहा जणांवर काळ म्हणून आली. कसाऱ्याहून सीएसएमटीला निघालेली आणि सीएसएमटीकडून कल्याणकडे निघालेल्या लोकल दिवा-मुंब्रा स्थानकादरम्यान घासल्या गेल्यानं अपघात घडला. यावेळी दोन्ही लोकलच्या फूटबोर्डवर प्रवासी उभे होते, तेही एकमेकांना धडकल्यानं खाली रेल्वे रुळावर पडले, आणि यात त्यांचा मृत्यू झाल्याची माहिती आहे. मिळालेल्या माहितीनुसार, अपघातात तीन महिला आणि तीन पुरूषांचा मृत्यू झालाय. तर ८ ते १० जण जखमी असून त्यांच्यावर रूग्णालयात उपचार सुरू आहेत. लोकल जवळून गेल्यामुळे दारात लटकत उभे असणारे प्रवाशी एकमेकांना घासले गेले अन् त्यांचा तोल गेला. त्यामुळे ते प्रवाशी रूळावर पडले. दोन्ही लोकलच्या दारात उभे असणारे १० ते १२ प्रवाशी रेल्वे रूळावर पडले. काही जणांची पाठ सोलली गेली. डोक्याला जबर मार लागला. त्यामुळे रेल्वे रूळावर जिकडे तिकडे मृतदेह अन् रक्तच दिसून आले.