वैष्णवांच्या मांदियाळीचे शाही स्वागत | Sakal
sakal

बोलून बातमी शोधा

Ashadi wari 2022 sant tukaram maharaj and sant Dnyaneshwar maharaj palkhi at phaltan warkari

वैष्णवांच्या मांदियाळीचे शाही स्वागत

फलटण : परब्रम्ह विठ्ठलाला भेटण्यासाठी निघालेल्या लाखो वैष्णवांची मांदियाळी टाळ-मृदंगाच्या गजरात, माउली-माउली नामाचा जयघोष करीत संस्थानिकांच्या फलटणनगरीत दोन दिवसांच्या मुक्कामी विसावली. पालखी मार्गावरील अर्धा टप्पा सोहळ्याने पार केला. रामरायाच्या आणि महानुभव जैन धर्मीयांची दक्षिण काशी म्हणून समजल्या जाणाऱ्या ऐतिहासिक नगरीत पंढरीच्या वारकऱ्यांचे रांगोळ्यांच्या पायघड्या अन् पुष्पवृष्टी करीत शाही स्वागत करण्यात आले.

तरडगाव येथील तळावर माउलींच्या पादुकांना प्रमुख विश्वस्त योगेश देसाई यांच्या हस्ते विधिवत पूजा केली. त्यानंतर सोहळा तरडगावहून फलटणच्या दिशेने मार्गस्थ झाला. लाखो वारकरी, विक्रेते, परिसरातील भाविक सोहळ्यात चालत होते. सोहळा काळजमार्गे सुरवडी आणि निंभोरे ओढा येथे आला. येथे विश्रांती घेतल्यानंतर वारकरी पुन्हा फलटणच्या दिशेने चालू लागले. हवामान अधूनमधून ढगाळ, तर कधी ऊन पडत होते. यामुळे वाटचालीत वारकरी घामाच्या धारांनी डबडबले होते. दुपारनंतर वारकऱ्यांची पावले काहीशी मंदावली होती.

फलटण नगरीतील भाविक पालखीच्या स्वागतासाठी निंभोरे ओढ्यापर्यंत येत होते. फलटणकरांकडून दूध, केळी, चिक्की, जेवण दिले जात होते. पालखी सोहळा शिस्तीने फलटण शहरात येऊ लागला तशी दर्शनासाठी येणाऱ्या स्थानिक भाविकांची गर्दी वाढू लागली. शहरात प्रवेश केल्यापासून पालखी तळापर्यंत जागोजागी रांगोळ्यांच्या पायघड्या होत्या. राम मंदिराजवळ सोहळा आल्यावर पालखी दर्शनासाठी आणि पुष्पवर्षावासाठी गर्दी झाली होती.

मुक्त चालणाऱ्या वारकऱ्यांमुळे गैरसोय

बिगर नंबरचे, तसेच सोहळ्यापुढे मुक्त चालणाऱ्यांची संख्या वारीत अधिक आहे. हे वारकरी मिळेल, तिथे आसरा घेऊन राहत होते. त्यांच्यामुळे रांगेत चालणाऱ्या अधिकृत दिंड्यांची गैरसोय होत होती.

आईच्या पुण्याईने आम्ही तिघी बहिणी पहिल्या वर्षी वारी करतो आहे. पहिल्या दिवशी एक किलोमीटरही वारी करता आली नाही. पण दुसऱ्या दिवशीपासून वारकऱ्यांची निष्ठा आणि भक्ती पाहून त्यांच्यातील विठ्ठलाप्रती असलेली ओढ पाहून चालण्याची ताकद मिळाली. वारीत चैतन्याची अनुभूती येते. भगवंत हा मंदिरात नसतो, तो प्रत्येक भक्तामध्ये असतो, याची प्रचिती वारीमध्ये येते.

- आशा काटकर, पुणे

Web Title: Ashadi Wari 2022 Sant Tukaram Maharaj And Sant Dnyaneshwar Maharaj Palkhi At Phaltan Warkari

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..