दुष्काळापासून जनतेचे रक्षण कर - उदयनराजे 

सातारा - नवरात्रोत्सवानिमित्त खासदार उदयनराजे भोसले यांनी आज राजघराण्याचे कुलदैवत असलेल्या प्रतापगडावरील भवानीमातेचे दर्शन घेत आरती केली. दुष्काळी परिस्थितीला तोंड देण्याची शक्ती महाराष्ट्रातील जनतेला दे. दुष्काळात कोणीही आत्महत्या करू नये. काहीही करून पाऊस पडू देत... असे साकडेही त्यांनी भवानीमातेच्या चरणी घातले. 

सध्या सातारा लोकसभा मतदारसंघावरून राष्ट्रवादी व उदयनराजे यांच्यात शीतयुद्ध सुरू आहे. उदयनराजेंनी कालच (ता. 15) जलमंदिर या निवासस्थानी समर्थकांची बैठक घेऊन आगामी वाटचालीबाबत चर्चा केली. आज त्यांनी प्रतापगडावर जाऊन भवानीमातेचे दर्शन घेतले. त्यांच्यासमवेत त्यांचे समर्थक व कार्यकर्ते उपस्थित होते. भवानीमातेची आरती त्यांच्या हस्ते झाली. त्यानंतर त्यांनी पत्रकारांशी संवाद साधला. प्रत्येक वर्षी मी प्रतापगडावर भवानीमातेच्या दर्शनासाठी येतो. या वेळेसही आलो आहे. सध्या पावसाने दडी मारल्याने या वर्षीच्या दुष्काळ भीषण असेल. या परिस्थितीला तोंड देण्याची शक्ती महाराष्ट्रातील जनतेला दे. दुष्काळी स्थितीमुळे कोणीही आत्महत्या करू नये. काहीही करून पाऊस पडू देत, असे साकडे भवानीमातेच्या चरणी घातल्याचे त्यांनी नमूद केले. या वेळी साताऱ्याचे उपाध्यक्ष सुहास राजेशिर्के, ऍड. दत्तात्रय बनकर, जितेंद्र खानविलकर, विकास शिंदे, दिलीप गवळी, समीर माने उपस्थित होते.