‘पीएनबी’बाहेर ठेवीदारांच्या रांगा

कोलकता - हिरे व्यापारी नीरव मोदी याने ‘पंजाब नॅशनल बॅंके’ला (पीएनबी) ११ हजार ३०० कोटी रुपयांना गंडा घातल्यानंतर आता देशभरातील या बॅंकेच्या व्यवहारांवर याचा परिणाम होऊ लागला आहे.

पश्‍चिम बंगालमध्ये अनेक ठेवीदारांनी या बॅंकेतील आपल्या ठेवी काढून घ्यायला सुरवात केली असून, ‘गीतांजली जेम्स’ची फ्रॅंचायझी घेतलेल्या अनेक सुवर्णकारांनी रातोरात गीतांजलीची फलके उतरविली असून, त्या ठिकाणी दुसऱ्या ब्रॅंडची नावे लावली आहेत. सिलीगुडी, उत्तर बंगालमधील दागिन्यांच्या शोरूमवरील ‘गीतांजली’चे नाव गायब झाले आहे. ‘गीतांजली’च्या जागी ‘पेरिवल जेम्स’चे नाव झळकू लागले आहे.सर्वच गुंतवणूकदारांनी ‘पीएनबी’मधील ठेवी काढून घ्यायला सुरवात केल्याने बॅंक कर्मचाऱ्यांच्या कामाचा व्याप वाढला आहे. काहीजण केवळ खाते सुरू राहावे म्हणून नाममात्र रक्कम या बॅंकेमध्ये ठेवत असल्याचे आढळून आले आहे. ‘पीएनबी’च्या अधिकाऱ्यांनी जरी याचा इन्कार केला असला, तरीसुद्धा बॅंकिंग क्षेत्रातील तज्ज्ञांच्या मतानुसार या बॅंकेवरील लोकांचा विश्‍वास उडाला आहे. वर्धमान जिल्ह्यातील ठेवीदारांनी साडेतीन कोटींच्या ठेवी काढून घेतल्याचा दावा करण्यात आला.