मानसिकतेवर आधारित फाळणीचा नवा धोका: गोपाळकृष्ण गांधी

वृत्तसंस्था
शुक्रवार, 4 ऑगस्ट 2017

जातीयवादाचे प्रक्षेपणास्त्र थांबविण्याची गरज

नवी दिल्ली: श्रद्धा, विचार आणि अभिव्यक्ती स्वातंत्र्यावर प्रत्यक्ष व अत्यप्रत्यक्षपणे हल्ला चढविला जात असून, मानसिक पातळीवर नवीन फाळणी करण्याचा प्रयत्न सध्या सुरू असल्याची टीका उपराष्ट्रपतिपदाचे विरोधी पक्षांचे उमेदवार गोपाळकृष्ण गांधी यांनी गुरुवारी केली. जातीयवादाचे प्रक्षेपणास्त्र थांबविण्याची गरजही त्यांनी व्यक्त केली.

जातीयवादाचे प्रक्षेपणास्त्र थांबविण्याची गरज

नवी दिल्ली: श्रद्धा, विचार आणि अभिव्यक्ती स्वातंत्र्यावर प्रत्यक्ष व अत्यप्रत्यक्षपणे हल्ला चढविला जात असून, मानसिक पातळीवर नवीन फाळणी करण्याचा प्रयत्न सध्या सुरू असल्याची टीका उपराष्ट्रपतिपदाचे विरोधी पक्षांचे उमेदवार गोपाळकृष्ण गांधी यांनी गुरुवारी केली. जातीयवादाचे प्रक्षेपणास्त्र थांबविण्याची गरजही त्यांनी व्यक्त केली.

"उपराष्ट्रपतींची भूमिका' या विषयावर गांधी व राष्ट्रीय लोकशाही आघाडीचे उपराष्ट्रपतिपदाचे उमेदवार वेंकय्या नायडू यांच्यामध्ये चर्चासत्राचे आयोजन केले होते. त्यानंतर जनतेला उद्देशून गांधी यांनी पत्र लिहिले आहे. भारताची फाळणी आता भूतकाळ असली, तरी मानसिक विभागणीवर आधारित नव्या फाळणीचे विचार सुरू आहेत आणि असे जातीयवादाचे प्रक्षेपणास्त्र थांबविणे महत्त्वाचे आहे, असे त्यांनी म्हटले आहे. ""लोकशाहीतील श्रद्धा, विचार आणि अभिव्यक्ती स्वातंत्र्यावर प्रत्यक्ष व अप्रत्यक्ष हल्ले होत आहेत. नागरी सेवा देणाऱ्या संस्थांवरील दबाव स्पष्टपणे जाणवत आहे. अशा यंत्रणांमध्ये जेथे मतभेद उघड होत असतात, तेव्हा नियमानुसार वागणे त्यांना भाग पाडले जाते. तेथे बोलण्याचा प्रयत्न केला की त्यांना शांत केले जाते. परस्पर विश्‍वासाचा संबंध जेथे येतो तेथे असंहिष्णुता, धर्मांधतेचे प्रमाण सर्वाधिक असते,'' असे ते म्हणाले.

गोपाळकृष्ण गांधी हे राष्ट्रपिता महात्मा गांधी यांचे नातू आहेत. ते म्हणाले, की अजून सहा महिन्यांनी आपण महात्मा गांधी यांची हत्या व वेदनादायी फाळणीच्या 70 व्या स्मृती वर्षाचे आयोजन करणार आहोत. फाळणी, 1946-47मधील दंगलीचे वास्तव आता भूतकाळात जमा झाले आहे, तरीही मानसिकतेमधील विभागणीवर आधारित नव्या फाळणीची निर्मिती आमच्या मनात होत आहे. मुक्त व निःपक्ष वातावरणात निवडणुका घेत असल्याबद्दल निवडणूक आयोगाचे कौतुक करतानाच ""आपण स्वतः किती स्वतंत्र आहोत याचाही विचार करायला हवा. आपण भयमुक्त आहोत का? आपले जीवन आपल्या मर्जीनुसार व्यतीत करण्याचे, आपले विचार व्यक्त करण्याचे स्वातंत्र्य आपल्याला आहे का? असा सवालही त्यांनी केला.