कंदाहार - अफगाणिस्तानची राजधानी असलेल्या काबूलसह देशातील अन्य दोन महत्त्वपूर्ण शहरांमध्ये घडविण्यात आलेल्या स्फोटांमध्ये किमान 50 नागरिक मृत्युमुखी पडले आहेत.
दक्षिण अफगाणिस्तानमधील कंदाहार प्रांतामध्ये येथील गव्हर्नरच्या निवासस्थानाजवळ झालेल्या स्फोटामध्ये किमान 9 नागरिक मृत्युमुखी पडले. जुमा मोहम्मद अब्दुल्ला अल काबी हे संयुक्त अरब अमिरातीचे राजदूत हे सध्या या भागाच्या भेटीवर आहेत. या स्फोटामध्ये ते, कंदाहारचे गव्हर्नर व अमिरातीच्या अन्य काही राजनैतिक अधिकाऱ्यांसह या स्फोटामध्ये किमान 16 जण जखमी झाले. या स्फोटामुळे काही जणांची शरीरे ओळखू न येण्याइतपत जळाली आहेत.
या स्फोटाच्या काहीच तास आधी तालिबानने घडविलेल्या दोन स्फोटांमध्ये किमान 30 ठार; तर 80 जखमी झाले. अफगाणिस्तानमधील लोकप्रतिनिधींची कार्यालये या ठिकाणापासून जवळच आहे. याशिवाय, हेल्मंड या देशातील अशांत प्रांताची राजधानी असलेल्या लष्कर गाह येथेही तालिबानी दहशतवाद्याने घडविलेल्या आत्मघातकी हल्ल्यात 7 जण ठार झाले. या स्फोटांमधील मृतांची संख्या आणखी वाढण्याची भीती आहे.
अफगाणिस्तानमध्ये राजकीय स्थिरता कायम ठेवण्यासाठी येथील नेतृत्व संघर्ष करत असतानाच तालिबानकडून घडविण्यात आलेले हे हल्ले अत्यंत संवेदनशील मानण्यात येत आहेत.
|