आरोग्यसेविकेचा मुलगा बनला राज्याचा आरोग्य संचालक

सकाळ वृत्तसेवा
शुक्रवार, 6 एप्रिल 2018

अकरा पुस्तकांचे लेखक 
आरोग्य संचालक डॉ. संजीव कांबळे आरोग्य विभागात सेवा देत असताना जनतेला आरोग्यदायी शिकवण देण्यासाठी अकरा पुस्तके लिहिली आहेत. हिवताप, क्षयरोग अशा विविध विषयांवर पुस्तक लिहून ती गावखेड्यापासून तर दुर्गम भागात तसेच शहरात मोफत वितरित केले. विशेष असे की, त्यांच्या सेवानिवृत्तीचा कार्यकाळ जवळ आला आहे. त्यामुळे महिन्या दोन  महिन्यांसाठी त्यांची या पदावर नियुक्ती आहे. डॉ. कांबळे यांनी क्षयरोग नियंत्रणाच्या क्षेत्रात भरीव योगदान दिले आहे. केंद्र सरकारच्या आरोग्य मंत्रालयातर्फे क्षयरोगाच्या उच्चाटनासाठी युनिव्हर्सल ॲक्‍सेस टू ट्यूबरोक्‍युलोसिस केअर या महत्त्वाकांक्षी पथदर्शी प्रकल्पाला डॉ. कांबळे यांच्या नेतृत्वात सुरुवात झाली. खासगीत उपचार घेणाऱ्या क्षयरुग्णांना मोफत उपचाराची सोय देणारा हा देशातला पहिला पथदर्शी प्रकल्प आहे, हे विशेष.

नागपूर - ही गोष्ट म्हटली तर अगदी सोपी आणि म्हटली तर खूप काही सांगून जाणारी. आरोग्य विभागात चतुर्थश्रेणीतील आरोग्य सेविकेच्या पदावर काम करणाऱ्या मातेच्या एका मुलाने त्याच विभागातील सर्वोच्च अशा आरोग्य संचालकपदावर झेप घेतली. गुरुवार (ता. ६) महाराष्ट्र लोकसेवा आयोगाने नुकतीच त्यांची नियुक्ती झाल्याचा निकाल घोषित केला. नाव डॉ. संजीव वामनराव कांबळे. मूळचे नागपूरचे. सार्वजनिक आरोग्य विभागाचे आरोग्य संचालक म्हणून डॉ. कांबळे दोन दिवसांनंतर रुजू होतील. त्यांच्या निवडीने समाजासमोर एक आदर्श निर्माण झाला आहे. 

डॉ. संजीव वामनराव कांबळे यांच्या आईचे नाव प्रभा कांबळे. ते दिवस गरिबीचे होते. संसाराचा गाडा ओढताना होणारा त्रास लक्षात घेता शिक्षण होईल, हे सांगता येत नव्हते. परंतु, आईचे शब्द काळजावर कोरलेले. ‘लेकरा सायेब बन, बाबासाहेबांसारखा मोठा माणूस हो....’या आईच्या शिकवणीतून मोठा झाल्याचे सांगत आपल्या आयुष्यातील परमोच्च आनंदाचा आणि अभिमानाचा ठेवा आज ठरला आहे, अशी त्यांची प्रतिक्रिया. अनेकांना प्रेरणा देणारा हा क्षण असला तर मातेने केलेला संघर्ष आजही डॉ. कांबळे आठवतात. मिळेल ते काम केलं, ते सगळे कष्ट आज फळाला आले. 

नागपूरच्या मेडिकल कॉलेजमधून एमबीबीएस आणि एमडी पास झाल्यानंतर डॉ. कांबळे मेडिकलमध्येच अधिव्याख्याता म्हणून रुजू झाले. पुढे महाराष्ट्र लोकसेवा आयोगाच्या परीक्षेत  पास झाल्यानंतर आरोग्य विभागात वैद्यकीय अधिकारी पदावर नोकरी मिळाली. पुढे जिल्हा आरोग्य अधिकारी, आरोग्य उपसंचालक, सहसंचालक पदावर काम केले. नुकतेच महाराष्ट्र लोकसेवा आयोगाच्या परीक्षेत सर्वाधिक गुण त्यांना मिळाले आणि राज्याच्या आरोग्य संचालकपदावर त्यांची नियुक्ती झाली. नागपूर, ठाणे, नाशिक असे राज्यभरात त्यांनी काम केले हे विशेष. 

Web Title: nagpur vidarbha news dr. sanjiv kambale state health director