उपजिल्हाधिकारी यांच्या घरातून पिस्तूल दाखवून दागिने व रोकड लंपास

वाडा - तालुक्यातील वडवली येथे राहणारे महसूल विभागातून उपजिल्हाधिकारी पदावरून निवृत्त झालेले नामदेव जाधव यांच्या घरावर आज पहाटेच्या सुमारास अज्ञात दरोडेखोरांनी पिस्तूल व चॉपरचा धाक दाखवून सोन्याचे दागिने, रोकड असा एकूण 4 लाख 40 हजारांचा ऐवज लंपास केल्याने संपूर्ण तालुक्यात खळबळ माजली आहे. 

पोलिस सूत्रांनी दिलेल्या माहिती नूसार मंगळवारी पहाटे 3.30 वाजताच्या सुमारास सात अज्ञात दरोडेखोरांनी नंग्या तलवारी नाचवत माजी उपजिल्हाधिकारी जाधव यांच्या घराच्या स्वयंपाकगृहाच्या खिडकीतून प्रवेश करत घरात झोपलेल्या त्यांचे भाऊ प्रकाश, आई व अन्य नातेवाईकांना पिस्तूल व चॉपरचा धाक दाखवून धमकावले. त्यानंतर त्यांनी जाधव यांच्या आईकडे चाव्यांची मागणी करून घरातील पाचही कपाटांच्या चाव्या ताब्यात घेत कपाटातील 3 गंठन, 5 अंगठ्या, धनेमाळ 1, चैन, मंगळसूत्र असे सुमारे 20 तोळे सोन्याचे दागिने व 25 हजार रोकड असा सुमारे चार लाख 40 हजार रुपये किमतीचा ऐवज लंपास केला आहे. 

वडवली गावातील भर वस्तीत असलेल्या घरात राजरोसपणे हा दरोडा पडल्याने पोलिसांच्या कार्यक्षमतेवरच प्रश्नचिन्ह निर्माण झाले असून परिसरात भितीचे वातावरण पसरले आहे. या घटनेसंदर्भात वाडा पोलिस ठाण्यात भादवि कलम 395 व आर्म अक्ट 3/25 नूसार गुन्हा दाखल करण्यात आला असून या गुन्ह्याचा अधिक तपास वाडा पोलीस निरीक्षक सुदाम शिंदे हे करीत आहेत.

आपण एका क्लिकवर ताजे अपडेट्स आपल्या मोबाईलमध्येही मिळवू शकता.

• 'ई सकाळ'चे अॅप डाउनलोड करण्यासाठी क्लिक करा.
• शेतीविषयीची अपडेट असलेले 'अॅग्रोवन' अॅप डाउनलोड करण्यासाठी ​क्लिक करा.
• राजकारणाची प्रत्येक घडामोड कळविणारे 'सरकारनामा' अॅप डाउनलोड करण्यासाठी क्लिक करा.