CSK च्या ताफ्यात 'बेबी मलिंगा' म्हणून एन्ट्री केलेला पथिराना आहे तरी कोण?

आयपीएलच्या 62 व्या सामन्यात गुजरात टायटन्सने चेन्नई सुपर किंग्जचा (Chennai Super Kings) 7 विकेट्सनी पराभव केला. जरी हा सामना गुजरातने जिंकला असला तरी या सामन्यात चेन्नई सुपर किंग्जच्या एका गोलंदाजाचीच चर्चा सुरू आहे.

हा गोलंदाज आहे श्रीलंकेचा मथीशा पथिराना (Matheesha Pathirana). त्याची गोलंदाजी पाहून सर्वांना मलिंगा आठवला. सध्या त्याच्या नावाची चर्चा सोशल मीडियावर बेबी मलिंगा म्हणून सुरु आहे. त्याने काल झालेल्या सामन्यात गुजरातच्या तीन विकेट पडल्या त्यातील दोन विकेट घेतल्या.

तर हा बेबी मलिंगा म्हणून प्रसिद्ध झालेला पथिराना आहे तरी कोण?

मथीशा पथिराना मुळचा श्रीलंकेचा आहे. आयपीएल २०२२ च्या आधी जानेवारी आणि फेब्रुवारी माहिन्यात वेस्ट इंडीजमध्ये १९ वर्षाखालील आयसीसी विश्वचषक खेळला गेला. या स्पर्धेत पथिरानाने श्रीलंका संघाचो प्रतिनिधित्व केले होते. त्याची गोलंदाजीची पद्धत माजी दिग्गज लसिथ मलिंगाप्रमाणे आहे. मलिंगा डावाच्या पहिल्या चेंडूवर विकेट घेण्यासाठी आणि उत्कृष्ट यॉर्कर चेंडूसाठी ओळखला जायचा. पथिरानाने पहिल्याच आयपीएल सामन्यात या दोन्ही गोष्टी साध्य करून दाखवल्या आहेत.

आयपीएल २०२२ च्या मेगा लिलावात तो अनसोल्ड राहिला होता. मात्र, त्याने याच सीझनमध्ये सीएसकेकडून दिमाखात पदार्पण केले. पदार्पणाच्या सामन्यात मथीशाने ३.१ षटके गोलंदाजी केली आणि यामध्ये २४ धावा खर्च करून दोन महत्वाच्या विकेट्स घेतल्या.

मथिशा हा श्रीलंकेचा युवा वेगवान गोलंदाज आहे. मथिशाने श्रीलंकेच्या १९ वर्षांखालील संघाकडून खेळताना नेत्रदीपक कामगिरी केली होती. त्याचवेळी चेन्नईच्या संघाचे लक्ष त्याच्यावर गेले. चेन्नईच्या संघाला त्याची गोलंदाजी शैली आणि त्याच्यामधली गुणवत्ता आवडली आणि त्यांनी थेट मथिशाला आपल्या ताफ्यात दाखल करून घेतले. आतापर्यंत चेन्नईने त्याला संधी दिली नव्हती. पण गुजरातविरुद्धच्या सामन्यामध्ये चेन्नईने मथिशाला पदार्पण करण्याची संधी दिली आणि त्यानेही या संधीचे सोने केले.

मथिशा पाथिराना 2020 आणि 2022 मध्ये श्रीलंकेच्या अंडर-19 विश्वचषक संघात होता. सीएसकेने त्याला 20 लाखांच्या किमतीत विकत घेतले आहे. 2020 टी 20 विश्वचषकादरम्यान 175 kmph वेगाने चेंडू फेकून मथिशा प्रसिद्धीच्या झोतात आला आहे.