आदित्य ठाकरेंना मुख्यमंत्र्याच्या गाडीत बसण्यापासून रोखलं; उद्धव ठाकरेंची नाराजी

मुंबई : पंतप्रधान नरेंद्र मोदी (PM Narendra Modi) आज देहू येथील संत तुकाराम शिळा मंदिराचं लोकार्पण करण्यासाठी आले होते. त्यानंतर ते मुंबईतील राज भवनात एका महत्त्वाच्या कार्यक्रमासाठी हजर राहिले होते. या कार्यक्रमासाठी महाराष्ट्राचे मुख्यमंत्री उद्धव ठाकरे (CM Uddhav Thackeray), पर्यावरण मंत्री आदित्य ठाकरे (Aditya Thackeray) आणि राज्यपाल भगतसिंह कोश्यारी हेसुद्ध हजर राहिले होते. त्यावेळी आदित्य ठाकरे यांना मुख्यमंत्री उद्धव ठाकरे यांच्या गाडीत बसण्यास मनाई केली होती.

दरम्यान आज देहू येथील लोकार्पण सोहळा संपन्न करून पंतप्रधान नरेंद्र मोदी हे मुंबई येथील कार्यक्रमाला येणार होते. मुंबईत त्यांचे स्वागत करण्यासाठी राज्यपाल भगतसिंह कोश्यारी, मुख्यमंत्री उद्धव ठाकरे आणि आदित्य ठाकरे हे उपस्थित होते. सूत्रांच्या माहितीनुसार आयएनएस शिखर बेसवर पंतप्रधान नरेंद्र मोदी यांच्या व्हीआयपी सूचीमध्ये आदित्य यांचं नाव नव्हतं. त्यानंतर आदित्य यांना मुख्यमंत्र्यांच्या गाडीतून खाली उतरायला लावलं होतं. यावर मुख्यमंत्र्यांच्या नाराजीनंतर आदित्य यांना गाडीत बसण्याची परवानगी देण्यात आली होती.

या प्रकारानंतर मुख्यमंत्री उद्धव ठाकरे यांनी यंत्रणावर राग व्यक्त केला आहे. ते म्हणाले की आदित्य ठाकरे हे फक्त आमचे पुत्र म्हणून नाही तर प्रोटोकॉलनुसार मंत्र्यांच्या रूपात पंतप्रधानांचे स्वागत करण्यासाठी आले आहेत. त्यानंतर त्यांना पंतप्रधान नरेंद्र मोदी यांचे स्वागत करण्याची परवानगी देण्यात आली आहे. पंतप्रधान मोदी आज राजभवनातील पुनर्निर्मित रहिवाशी भवन 'जल भूषण'चे उद्घाटन करणार आहेत. यामध्ये राज्यपालाचे कार्यालय आणि निवासस्थान सुद्धा असणार आहे. या उद्घाटनानंतर मोदी राजभवन परिसरातील ऐतिहासिक गुंडी मंदिरातही जाणार आहेत.