मराठा आरक्षणासाठी शिवेंद्रसिंहराजे आग्रही

सातारा - मराठा आरक्षणासाठी सुरवातीपासूनच आग्रही आणि आक्रमक राहिलेले आमदार शिवेंद्रसिंहराजे भोसले यांनी पावसाळी अधिवेशनात मराठा आरक्षणाच्या मुद्यावर जोरदार आवाज उठवला. विरोधी पक्षनेते राधाकृष्ण विखे-पाटील, अजित पवार यांच्यासोबत शिवेंद्रसिंहराजे यांनी मराठा समाजाच्या आरक्षणावर ताताडीने निर्णय घ्यावा, अशी जोरदार मागणी काल सभागृहात केली. 

कोपर्डी घटनेनंतर साताऱ्यात निघालेल्या मराठा क्रांती मूक मोर्चात शिवेंद्रसिंहराजेंनी सक्रिय सहभाग घेऊन मराठा समाजाचे आरक्षण आणि विविध मागण्या मान्य होण्यासाठी आक्रमक भूमिका स्वीकारली. त्यानंतर झालेल्या विविध आंदोलनांत शिवेंद्रसिंहराजे हे मराठा समाजाचा एक घटक म्हणून सहभागी होते. साताऱ्यात हा लढा तीव्र होण्यासाठी मोर्चा, कॅण्डल मार्च आदी आंदोलने यशस्वीपणे पार पाडण्यासाठी शिवेंद्रसिंहराजे यांनी प्रत्येक बैठकीला हजेरी लावली होती. तसेच सर्व प्रकारच्या आंदोलनासाठी आयोजकांना सर्व प्रकारचे सहकार्य करून मोर्चा आणि कॅण्डल मार्च यशस्वी करण्यासाठी योगदान दिले होते. 

नागपूर येथील अधिवेशनात मराठा आरक्षणाचा मुद्दा गाजणार का, याकडे तमाम मराठा समाजाचे लक्ष आहे. सभागृहात मराठा आरक्षणाच्या मुद्द्यावर चर्चा सुरू झाली. मात्र, सरकार आरक्षणाबाबत उदासीन असल्याचे दिसताच विरोधी पक्ष नेते राधाकृष्ण विखे-पाटील, अजित पवार आणि शिवेंद्रसिंहराजे भोसले हे तिघे आक्रमक झाले. त्यांनी सभापतींच्यासमोर येऊन जोरदार आक्षेप नोंदवला. शिवेंद्रसिंहराजे यांनी आक्रमक पवित्रा घेत मराठा समाजाला आरक्षण मिळालेच पाहिजे, अशी रोखठोख भूमिका घेतली. सरकारने मराठा आरक्षणावर तातडीने सकारात्मक निर्णय घेऊन मराठा समाजाला न्याय द्यावा, अशी जोरदार मागणी या तिघांनी केली. यामुळे सरकारला मराठा आरक्षणाच्या मुद्यावर नमते घ्यावे लागले.