अनधिकृत लोखंडी कमानीवर कारवाई

मुंढवा - केशवनगर येथील लोणकर वस्ती चौकात अनधिकृतपणे लावलेली लोखंडी कमान वाहतुकीस अडथळा ठरत होती. याबाबतचे वृत्त दै. सकाळमध्ये प्रसिद्ध झाले होते. त्याची दखल घेत हडपसर क्षेत्रीय कार्यालयाच्या अतिक्रमण व आकाशचिन्ह विभागाकडून ती काढण्यात आली आहे. 

केशवनगर येथील लोखंडी कमान पूर्वी रस्त्यावर कोसळून पडली होती. त्यात सुदैवाने कोणालाही इजा झाली नव्हती. अतिक्रमण निरीक्षक श्रीकृष्ण सोनार व सहायक अतिक्रमण निरीक्षक दीपक ठोंबरे, आकाशचिन्ह विभागाचे परवाना निरीक्षक धनंजय भालेराव व शशिकांत देशमुख आदींनी ही कारवाई केली. तसेच मुंढवा चौक व केशवनगरमधील मांजरी रस्त्यावरील तब्बल चारशेहून अधिक अनधिकृत जाहिरात फलकांवर कारवाई करण्यात आली.