'टीस'च्या अहवालाने धनगर समाजात असंतोषत

बारामती : टाटा इन्स्टिट्युट ऑफ सोशल सायन्सचा अहवाल नकारात्मक आल्यामुळे धनगर समाजात असंतोषाचे वातावरण तयार झाले आहे. या अहवालासह राज्य शासनाच्या विरोधात आज बारामतीत बिरोबाची जत्रा घालून अभिनव पध्दतीने आंदोलन केले गेले. 

धनगर समाजाला एस टी आरक्षण दिले जावे यासाठी बारामतीत आज धनगर समाजाने बिरोबा देवाची जत्रा केली आणि मुख्यमंत्री देवेंद्र फडणवीस यांना सदबुध्दी देण्याचे साकडे घातले. भाजपा सरकारने धनगर समाजाला एसटी आरक्षणाची त्वरित अंमलबजावणी करावी अन्यथा राज्यभर तीव्र आंदोलन करण्याचा इशारा राष्ट्रवादी प्रदेश युवकचे उपाध्यक्ष किशोर मासाळ यांनी दिला.

धनगर समाज अनुसूचित जाती जमातीत असतानाही, धनगर आणि धनगड एकच असतानाही भाजप सरकारने टाटा इन्स्टिट्युट ऑफ सोशल सायन्सेस संस्थेने धनगर आणि धनगड वेगळे असल्याचा अहवाल शासनाला दिल्याने भाजप सरकार हा अहवाल उघड करत नसल्याचा आरोप या वेळी केला गेला.

यावेळी जिल्हा परिषदेचे अध्यक्ष विश्वास देवकाते, मदनराव देवकाते, गणपत देवकाते, संभाजी होळकर, डॉ. इंद्रकुमार भिसे, उत्कर्ष गलांडे, नितीन मासाळ, संपतराव टकले, प्रताप पागळे, दिपक मलगुंडे, सुधीर पानसरे, अभिजीत चव्हाण, पंकज देवकाते, तुषार कोकरे, तुषार लोखंडे उपस्थित होते.

टीस संस्थेने नकारात्मक अहवाल दिल्याने धनगर समाजाची सरकारने घोर फसवणुक केल्याची भावना समाजात निर्माण झाली आहे,  यामुळे दसरा मेळावा होताच राज्यभर आंदोलन केले जाणार असुन भाजप मंत्र्यांना राज्यात फिरु दिले जाणार नसल्याचा इशारा या वेळी दिला गेला.