पुणे : भुयारी मार्ग कुलुप बंद

पुणे : भुयारी मार्ग कुलुप बंद

पुणे : सोलापूर रस्त्यावरील फातमीनगर येथील वाहतुकीला शिस्त लागावी आणि पादचा-यांचे चालणे सुसह्य व सुरक्षित व्हावे, यासाठी बांधण्यात आलेला भुयारी पादचारी मार्गाचा योग्य नियोजनाअभावी वापर होत नसल्याचे स्पष्ट झाले आहे. लाखो रुपये खर्च करून 'भूमिगत'  भुयारी मार्गाकडे बघण्यास महापालिका तयार नसल्याने पादचा-यांची वाट अजूनही बिकटच आहे. गेल्या अनेक वर्षापासून हा मार्ग लोखंडी शटर लावून कुलूप बंद आहे. तो खुला करावा अशी मागणी नागरिकांक़़डून होत आहे. 

भूमीगत मार्ग बंद असल्य़ाच गैरफायदा घेत या भुयारी मार्गात गर्दुल्ले व मद्यपींनी आपला अड्डा बनवला आहे. या भुयारी मार्गामध्ये गुन्हेगारी घटनाही घडत असून आता तरी महापालिका प्रशासनाने हे भुयारी पादचारी मार्ग खुला करावा, अशी मागणी जोर धरत आहे. भुयारी मार्गाच्या एका मुख्य प्रवेशद्वारावर लोखंडी शटर लावलेले असून त्यावर कुलूपदेखील लावण्यात आलेले आहे. मात्र गर्दुल्ल्यांनी या मार्गाच्या दुस-या बाजूचा दरवाजा उघडून येण्या-जाण्याचा रस्ता तयार केला आहे. या मार्गात घाणीचे साम्राज्य पसरले आहे. या ठिकाणी नशापाणी केल्यानंतर महिलांशी गैरवर्तन करणे, एकटय़ादुकटय़ा पादचाऱ्याला लुटणे अशा घटना घडत आहेत. दोन दिवसांपूर्वी तर काही गर्दुल्ल्यांनी भुयारी मार्गातच कपडे पेटवून दिले होते.  

भुयारी मार्गात सुरक्षारक्षक कथडे तुटलेल्या अवस्थेत आहेत व भुयारी मार्गामध्ये लाईट सुध्दा नाही त्यामुळे नागरिक भुयारी मार्गामधुन ये जा करण्यास घाबरतात याचा फायदा सध्या तळीराम मद्यपींचा घेत आहे. या मार्गात जिथे- तिथे दारूच्या आणि पाण्याच्या बाटल्या पडलेलल्या आहेत. दुर्गंधी येत आहे. कचरा व चिखलाचे साम्राज्य आहे. हा भूयारी मार्ग बंद आहे. त्यामुळे जीव धोक्यात घालूनच पादचा-यांना रस्ता ओलांडावा लागतो. जवळच महापालिकेची शाळा आहे. येथील विदयार्थी रस्ता दुभाजकावर चढून धोकादायकरित्या रस्ता ओलांडतात. यातून यापू्र्वी अपघात देखील झाले आहेत. त्यामुळे हा मार्ग नागरिकांसाठी खुला करावा, अशी मागणी नागरिक दिनेश सामल यांनी केली आहे.  

याबाबत वानवडी-रामटेकडी क्षेत्रीय कार्यालयाचे सहाय्यक आयुक्त संजय गावडे म्हणाले, भुयारी मार्गाची पहाणी करण्याची सूचना अधिका-यांना दिल्या आहेत. भुयारी मार्गाची दुरूस्ती करणे, राडारोडा काढणे, विदयुत दिवे लावणे याबाबत नगरसेवक व अधिका-यांची चर्चा झाली आहे. लवकरच हे काम हाती घेवून भुयारी मार्ग नागरिकांसाच्या वापरासाठी खुला करण्यात येईल.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com