दहा हजार सॅनिटरी नॅपकिनचे शाळेतील मुलींना वाटप

राजेंद्रकृष्ण कापसे
शुक्रवार, 9 मार्च 2018

मासीक पाळी हा आपल्याकडे गुप्ततेचा विषय केला जातो. परिणामी त्या दिवसात स्वच्छतेकडे दुर्लक्ष होते. सॅनिटरी नॅपकिन बाबत शासन पातळीवर मुख्यमंत्री देवेंद्र फडणवीस व महिला व बाल विकासमंत्री पंकजा मुंडे यांनी योग्य भूमिका घेतली आहे. त्याला अनुसरून आम्ही आमची सामाजिक जबाबदारी, भान म्हणून हा विषय हाती घेतला आहे. खडकवासला मतदार संघातील शाळा, काॅलेज, वाड्या वस्त्यांवर जाऊन मासीक पाळीच्या काळात सॅनिटरी नॅपकिन वापराबाबत जनजागृती करणार.
सचिन दशरथ दांगट (वारजे कर्वेनगर प्रभाग समितीचे माजी स्वीकृत सदस्य व भाजपचे पदाधिकारी)

वारजे माळवाडी : शाळेतील मुलींना सॅनिटरी नॅपकिन स्वस्त दरात देण्याची भूमिका शासन पातळीवर घेतली आहे. त्यापूर्वीच आपली सामाजिक जबाबदारी ओळखून भाजपचे पदाधिकारी, उद्योजक व सामाजिक संघटना यांनि मिळून १०हजार सॅनिटरी नॅपकिन मोफत दिले जाणार आहेत. जागतिक महिला दिनाच्या औचित्य साधून या स्तुत्य उपक्रमाला वारजे माळवाडी येथून सुरवात झाली.

वारजे माळवाडी येथील कै.शामराव श्रीपती बराटे मनपा शाळा क्रमांक १६१येथील २००विद्यार्थींनींना एक महिन्याकरिता लागणारे सॅनिटरी पॅडसचे वाटप गुरुवारी करण्यात आले. भारतीय जनता पार्टीचे पदाधिकारी व प्रभाग समितीचे माजी स्वीकृत सदस्य सचीन दशरथ दांगट  इंडोटेक इंडस्ट्रीयल सोल्युशन्स प्रा.लि.आणि आकांक्षा नारी मंच यांचे संयुक्त विद्यमाने हा उपक्रम खडकवासला विधानसभा मतदार संघात हाती घेतला आहे.

यानंतर, नॅपकिन वाटप केल्यानंतर येथील मुलींना डाॅ.हेमांगी पाटसकर यांनी मासीक पाळी म्हणजे काय, त्यावेळी, कापड वापरण्याची पारंपरिक पध्दतीचे तोटे, सॅनिटरी पॅडस का वापरायचे, पाळीच्या दिवसात घ्यावयाची स्वच्छतेची काळजी, पॅडस वापरणे तसेच त्याची योग्य विल्हेवाट कशी लावावी. याची माहिती दिली. या प्रसंगी इंडोटेक कंपनीच्या नवीन व्हेडिंग मशीन वापराची माहिती आणि प्रात्यक्षिक मुलींना दाखविण्यात आले .

या कार्यक्रमास मुख्याध्यापिका सुनंदा हांडे, भाजपच्या महिला आघाडीच्या अध्यक्षा अॅड.अस्मिता जोशी, डाॅ.हेमांगी पाटसकर , तनिष्का पुनम चोरडिया, शाळा सुधार समितीच्या रेखा कलाल, इंडोटेकच्या हेमलता जंजिरे, वंदना पेठकर, सोनाली पाटील, इंडोटेक टीम , इयत्ता ५ वी ते ८ वी पर्यतच्या १५० विद्यार्थीनी, शाळेचे सर्व शिक्षक वृंद, सेवक वर्ग आदि उपस्थित होते. 

Web Title: marathi news sanitary napkin distribution new warje pune