#MilkAgitation तीन रुपये लालूच दाखवू नका - सतीश काकडे

सोमेश्‍वरनगर - ‘‘तीन रुपये दरवाढीची लालूच अजिबात दाखवू नका. कर्नाटक आणि भाजपशासित गुजरातमध्ये दूध दरात अनुदान दिले जाते, मग महाराष्ट्रात सरकारला काय अडचण आहे?’’ असा सवाल शेतकरी कृती समितीचे जिल्हाध्यक्ष सतीश काकडे यांनी केला. 

करंजेपूल (ता. बारामती) येथील मुख्य चौकात नीरा-बारामती रस्त्यावर शेतकरी कृती समिती व स्वाभिमानी शेतकरी संघटनेच्या वतीने दूध दरासाठी एक तास रास्ता रोको आंदोलन करण्यात आले. त्या वेळी सतीश काकडे बोलत होते. अध्यक्षस्थानी जिल्हा परिषद सदस्य प्रमोद काकडे होते.

याप्रसंगी पंचायत समितीचे माजी सदस्य अप्पाजी गायकवाड, दिग्विजय जगताप, डॉ. राजकुमार गायकवाड, अशोक गायकवाड, कैलास मगर, विकास केंजळे, अशोक शेंडकर, सुजित काकडे, माणिक लकडे आदी उपस्थित होते. नायब तहसीलदार महादेव भोसले व फौजदार विकास बडवे यांना मागण्यांचे निवेदन सुपूर्द करण्यात आले. 

सतीश काकडे म्हणाले, ‘‘बारामतीने राज्याच्या ऊस आंदोलनाची दिशा ठरविली होती. राज्याचे ऊस आंदोलन बारामतीतूनच पेटले. तसेच, दूध आंदोलनही पेटू शकते. त्यामुळे बारामतीच्या नादाला लागू नका. दूध आंदोलनातही बारामतीत खासगी व सहकारी दूध संस्थांनी संकलन बंद ठेवून आंदोलना पाठिंबा दिला आहे. राजकीय पक्षांचे कार्यकर्तेही राजकीय जोडे बाजूला ठेवून सहभागी झाले आहेत. त्यामुळे सरकारने दुग्धजन्य पदार्थांवरील जीएसटी वगळावा आणि प्रतिलिटर पाच रुपये सभासदांच्या खाती वर्ग करावेत. आंदोलन जाहीर झाल्यावरच प्रतिलिटर तीन रुपये वाढविण्याची घोषणा झाली. असली लालूच दाखवू नका. शेतकऱ्याला पूर्ण हक्क मिळाला पाहिजे.’’ 

प्रमोद काकडे म्हणाले, ‘‘पाणी वीस रुपयांनी विकले जाते, पण कष्टकरी शेतकऱ्याच्या दुधाला सोळा- सतरा रुपये भाव मिळतो, हा विरोधाभास आहे.’’ स्वाभिमानीचे तालुकाध्यक्ष कल्याण भगत, शहाजी जगताप, निंबूतचे सरपंच राजकुमार बनसोडे, दिलीप पवार, बंटी जगताप यांनी मनोगत व्यक्त केले. सुरेश शेंडकर यांनी प्रास्ताविक; तर मदन काकडे यांनी सूत्रसंचालन केले.

शिवलिंगास दुधाचा अभिषेक
या आंदोलनामुळे रस्त्याच्या दोन्ही बाजूला दीड किलोमीटरच्या वाहनांच्या रांगा लागल्या होत्या. आंदोलनानंतर श्री क्षेत्र सोमेश्‍वर देवस्थान येथे जाऊन स्वयंभू शिवलिंगास दुधाचा अभिषेक करत, ‘सरकारला बुद्धी दे,’ अशी प्रार्थना करण्यात आली. शिवाजी शेंडकर, बाबू शेंडकर, महेश शेंडकर, तुषार शेंडकर यांनीही मोफत दूधवाटप केले व शिवलिंगास अभिषेक केला.