महागाईविरोधात शिवसेनेचा लाटणे मोर्चा

यशपाल सोनकांबळे
मंगळवार, 26 सप्टेंबर 2017

जीवनावश्यक वस्तू वरील दर स्थिर ठेवण्यात केंद्र सरकार अपयशी ठरले आहे. दिवसेंदिवस पेट्रोल, डिझेल आणि गॅसच्या दरामध्ये वाढ करण्यात येत आहे.

पुणे : गॅस सिलेंडर, पेट्रोल-डिझेल, दुध, साखर, तेलाची अशा जीवनावश्यक वस्तुंची भाववाढीमुळे झालेल्या महागाईच्या निषेधार्थ केंद्र आणि राज्यसरकारच्या विरोधात मंगळवारी शिवसेनेच्या वतीने भारतरत्न डॉ. बाबासाहेब आंबेडकर उद्यान ते जिल्हाधिकारी कार्यालयापर्यंत ‘लाटणे मोर्चा’ काढण्यात आला.

या मोर्चामध्ये महिला मोठ्या संख्येने सहभागी झाल्या होत्या. "महागाई वाढली बुलेट ट्रेन च्या वेगाने, कधी येणार अच्छे दिन, भाजप एक धोका है, देश बचालो मौका है, पेट्रोल भाज्यांनी रडवले रे अच्छे दिन आणणाऱ्यानी फसवले, एवढी लाटणे कशाला, भाजपाला ठोकायला," अशा भाजपविरोधात घोषणाबाजीही यावेळी करण्यात आली.

याप्रसंगी शिवसेनेच्या उपनेत्या नीलम गोऱ्हे, सेनेचे जिल्हा संपर्क प्रमुख उदय सामंत, शहराध्यक्ष विनायक निम्हण, सेनेचे पालिकेतील गटनेते संजय भोसले, माजी आमदार चंद्रकांत मोकाटे, महादेव बाबर, शहर संघटक श्याम देशपांडे, बाबा धुमाळ, दत्ता टेमगिरे, महिला आघाडीच्या तृष्णा विश्वासराव, निर्मला केंडे, कीर्ती फाटक, नगरसेवक विशाल धनवडे, बाळा ओसवाल, अविनाश साळवे, माजी नगरसेवक प्रशांत बधे , संजय मोरे, युवा सेनेचे किरण साळी आदी उपस्थित होते.

जीवनावश्यक वस्तू वरील दर स्थिर ठेवण्यात केंद्र सरकार अपयशी ठरले आहे. दिवसेंदिवस पेट्रोल, डिझेल आणि गॅसच्या दरामध्ये वाढ करण्यात येत आहे. यामुळे सर्व सामान्य नागरिकांचे जगणे कठीण झाले आहे. त्या विरोधात हा मोर्चा आयोजित करण्यात आला. वाढत्या महागाई विरोधात हा सार्वसामान्यांचा आक्रोश आहे, सत्तेत जरी असलो तरी सर्वसामान्यांच्या प्रश्नासाठी रस्त्यावर उतरत राहणार असल्याचा निर्धार यावेळी उदय सामंत यांनी व्यक्त केला. यावेळी विविध मागण्याचे निवेदन जिल्हाधिकाऱ्यांना देण्यात आले.

Web Title: pune marathi news shiv sena latane morcha