नागरीकांनी पूढाकार घेऊन ही अंधश्रद्धा घालविणे गरजेचे आहे

टाकळी हाजी - ग्रामीण भागात भानामती व जादूटोणा करत अघोरी उपाय करून उतारे करत नागरीकांना घाबरविण्याचे प्रकार होतात. असे करून कोणताही वाईट परीणाम होत नाही. पण अशा प्रकाराला आळा घालण्यासाठी नागरीकांनी पूढाकार घेऊन ही अंधश्रद्धा घालविणे गरजेचे आहे. असे मत पुणे अनिस च्या कार्यकर्त्या नंदिनी जाधव यांनी व्यक्त केले.  

शिरूर तालुक्यातील मलठण येथील ओढ्याजवळ झाडावर काळ्या बाहुल्या, टाचण्या व काही नागरीकांच्या नावाची चिठ्ठी लिहून त्यावर रक्ताचे डाग असलेली पिशवी सापडली. त्यावेळी घाबरलेल्या नागरीकांना प्रबोधन करताना ते बोलत होत्या.

यावेळी पंचायत समिती सदस्य डॅा.सुभाष पोकळे, सरपंच कैलास कोळपे, दत्तात्रेय गायकवाड, चेतना ढमढेरे, डॅा. पार्वती कदम, सतीष शिंदे, युवराज थोरात उपस्थीत होते. 

जाधव म्हणाले की, बांदावरची भांडणे किंवा इतर किरकोळ भांडणातून घाबरविण्यासाठी असे प्रकार घडत असतात. असे नारळ, लिंबू आम्ही खाल्लेले आहे. आम्हाला काहीही झाले नाही. त्यामुळे कोणीही घाबरून जाऊ नये. मात्र यावर उपाय म्हणून असे प्रकार उघडीस आणले पाहिजे. त्यातून नरबळी सारखा प्रकार होऊ नये यासाठी प्रतिबंद करणे आवश्यक आहे. असा प्रकार करणाऱ्यावर जादूटोणा कायद्या अंतर्गत गुन्हा दाखल होऊ शकतो. 
 पोकळे म्हणाले की, या परीसरात अशिक्षीत नागरीक अधिक असल्याने असे प्रकार घडून येतात. पण असे प्रकाराला आळा घातला पाहिजे. अशा व्यक्तीने कठोर कारवाई करणे गरजेचे आहे. या बाबत पोलीस स्टेशनला माहिती देण्यात आली असून नागरीकांनी अशा प्रकाराला घाबरू नये. असे आवाहन केले. 

या परीसरात अंगात येणे, जादुटोणा, भानामती करणे असे अनेक प्रकार घडतात. मागील काळात मलठण परीसरात नरबळीचा प्रकार उघडीस आणला होता. त्यानंतर देखील जादुटोणा चे प्रकार होतच आहेत. येथील झाडावर सरपंच कैलास कोळपे यांच्या घरातील सर्वांची नावे टाकून नारळ, लिंबू, टाचण्या, काळ्या बाहुल्या व रक्ताचे डाग असलेली पिशवी झाडाला टांगलेली आढळली. अंधश्रद्धा निर्मूलन समितीच्या कार्यकर्त्यानी ते सर्व साहित्य जाळून नष्ठ केले.