|
स्मार्टफोनच्या दुनियेत घडत असलेल्या क्रांतीने आणखी एक टप्पा गाठला आहे. स्पर्धेतून असो वा नावीन्याच्या ध्यासातून; पण आपल्या हातातील फोनचा दिवसेंदिवस वाढत असलेला स्मार्टनेस आपल्या जगण्यात आमूलाग्र परिवर्तन घडवून आणणार आहे, हे निश्‍चित. उच्च वर्गातील लोकप्रिय "ऍपल'ने पहिला आयफोन सादर केल्यानंतर दशकभराने पूर्णपणे नवी रचना असलेला आयफोन बाजारात आणून जणु एकच धमाका उडवून दिला आहे. "आयफोन 8', "8 प्लस' आणि "आयफोन एक्‍स' अशी मॉडेल सगळ्यांसाठी आणली आहेत. त्यातील वेगवेगळी फीचर्स ही एकेकाळी कल्पनेतदेखील अशक्‍य वाटली असती; पण आज मात्र सगुण, साकार रूपात लोकांसमोर येत आहेत.
उदाहरणार्थ, ऍपलच्या आयफोनने आता "मेरी आवाज ही पहचान है'प्रमाणे "चेहरा ही पहचान है' म्हणायची वेळ आणली आहे. "ऍपल'च्या आयफोनमध्ये पासवर्ड म्हणून आता "फेशियल रेकग्निशन तंत्रा'चा वापर केला आहे. जेणेकरून तुमचा चेहरा तुमच्या ऍपल आयफोनने बघितल्याशिवाय तो कामच करणार नाही. या नवीन तंत्रज्ञानाला त्या व्यक्तीचे छायाचित्र दाखवूनही फसवता येणार नाही. जरी वय वाढले किंवा वयोमानानुसार बदल झाले तरी फोन तुम्हाला ओळखेल अशी यंत्रणा आहे. डिजिटलच्या जमान्यात "आर्थिक सुरक्षितता' महत्त्वाची असते. म्हणूनच ऍपलने "फेस आयडी' बघून काम करणारा फोन सादर केला. त्याद्वारे तुम्ही "ऍपल पे डिजिटल पेमेंट सिस्टिम'शी जोडले जाणार आहात. त्यामुळे तुमच्याशिवाय तुमच्या फोनवरूनदेखील कोणीही आर्थिक व्यवहार करू शकणार नाही. आयफोनचे दुसरे वैशिष्ट्य म्हणजे तुमचा "मूड' आणि तुमचे हावभाव फोनला कळणार आहेत. त्यानुसार फोटोसोबत त्या संबंधित "इमोजी' पुढे येणार आहेत. ऍपलने मुख्य कॅमेराबरोबरच सेल्फी कॅमेऱ्यातही "पोर्ट्रेट मोड' दिलाय. अंधारातदेखील जबरदस्त "लाईटिंग इफेक्‍ट' मिळणार आहे. म्हणजे आता अंधारात तुम्हाला तुमच्या आवडत्या व्यक्तीशी व्हिडिओ चॅटिंगही शक्‍य आहे. एकूणच हे तंत्रज्ञान आपल्या जीवनात अधिक खोलवर शिरकाव करीत आहे. त्याचे नवनवे आविष्कार पाहता काल नवी वाटणारी गोष्ट आता फार लवकर जुनी वाटू लागली आहे. आता प्रश्‍न आहे तो या वेगाशी नीट जुळवून घेण्याचा. फोनचा स्मार्टनेस वाढत असताना आपला अंगभूत स्मार्टनेसही वाढवित नेण्याचा.
|
