महापालिका वर्तुळात आयुक्त बदलीची चर्चा

नाशिक - महापालिका आयुक्त तुकाराम मुंढे पंधरा दिवसांच्या रजेवर जाणार असले, तरी रजेपेक्षा त्यांच्या बदलीचीच चर्चा महापालिका वर्तुळात अधिक आहे. 

शहरात काही महिन्यांपासून आयुक्त मुंढे यांच्याविरोधात रोष आहे. सर्वप्रथम पालिका कर्मचारी व अधिकाऱ्यांच त्यांच्यावर रोष आहे. करयोग्य मूल्यदरात वाढ करून आयुक्तांनी सर्वसामान्य नागरिकांचा रोष ओढवून घेतला आहे. त्यात पिवळ्या पट्ट्यातील शेतजमिनीवर कर लागू केल्याने शेतकरीवर्ग भडकला आहे.

अनधिकृत लॉन्स, मंगल कार्यालये, पूररेषेतील बांधकामे अनधिकृत ठरवून तोडण्याची कारवाई सुरू केली आहे. उद्योगांकडील मोकळे भूखंड, पार्किंग आदींवर कर लावल्याने सर्वसामान्यांमध्ये करवाढीची भीती निर्माण झाली आहे. त्यात सिडकोतील अनधिकृत घरे तोडण्याचा निर्णय घेतल्याने तेथील नागरिक संतप्त झाले आहेत. सिडको बचाव संघर्ष समिती स्थापन करून आयुक्तांविरोधात भूमिका घेण्याचा निर्णय जाहीर करण्यात आला. शहर फेरीवाला धोरणाची अंमलबजावणी करताना चुकीच्या पद्धतीने फेरीवाला धोरण राबविले जात असल्याचा आरोप करत टपरीधारक, फेरीवाले आयुक्तांविरोधात आक्रमक झाले आहेत. भाजप नगरसेवकांकडूनही थेट मुख्यमंत्र्यांपर्यंत मुंढे यांच्याविरोधात तक्रारी पोचल्या आहेत. त्यातच शुक्रवारी (ता. २५) ग्रीनफिल्ड लॉन्सवरील कारवाईवरून आयुक्त मुंढे यांना शब्दांत फटकारल्याने चहूबाजूने विरोधात वातावरण तयार झाले आहे. त्या पार्श्‍वभूमीवर पंधरा दिवसांची रजा आयुक्तांनी टाकली आहे.