कळंबू परिसरात पावसाची हुलकावणी; बळीराजा चिंतातूर

कळंबू : कळंबूसह परिसरात पावसाच्या हुलकावणीमुळे बळिराजा हवालदिल झाला आहे. १२ जूनला कळंबू परिसरात पावसाने हजेरी लावली होती, त्याआधारे शेतकऱ्यांनी कापूस लागवड केली. मात्र लागवडीनंतर पावसाने हुलकावणी दिल्याने बळिराजा हवालदिल झाला आहे.

लावणी केलेले महागडे कापूस बियाणे वाया जाऊन शेतकरी आर्थिक संकटात सापडला आहे. रोजच दिवसभर उकाडा होऊन वातावरणात बदल होतो, मात्र हुलकावणीमुळे शेतकरी चिंतातूर झाला आहे. अर्धा जून महिना उलटला तरीही पावसाचे दमदार आगमन होत नसल्याने परिसरातील पेरण्या लांबणीवर जाण्याची भीती शेतकऱ्यांकडून व्यक करण्यात येत आहे. पावसाअभावी शेती कामे खोळंबल्याने शेतमजुरांच्या हाती कामे नसल्याने उदरनिर्वाहाचा प्रश्न निर्माण झाला आहे.