परस्पर भरती... खुलाशाची मुदत संपली... कारवाईकडे सर्वांचे लक्ष 

नगर  : जिल्हा परिषदेतील एक अधिकारी त्यांची कामे खासगी व्यक्तीकडून करून घेतात, ही बाब "सकाळ'ने समोर आणल्यानंतर सामान्य प्रशासनाने तीन जणांना नोटीस बजावून खुलासा मागविला. त्याचीही मुदत संपली आहे. आता प्रशासन "त्या' व्यक्तीवर काय कारवाई करते, याकडे सर्वांचे लक्ष लागले आहे. 

जिल्हा परिषदेतील एका विभागात अनेक वर्षांपासून खासगी व्यक्ती काम करीत आहे. ही बाब "सकाळ'ने समोर आणली. त्यानंतर सामान्य प्रशासनाने तातडीने तीन जणांना नोटीस बजावून त्यांच्याकडून खुलासा मागविला. या प्रकरणाची चौकशी होणे अपेक्षित होते; मात्र तसे झाले नाही.

अवश्य वाचा ः आजोबाच निघाला नातवाचा मारेकरी, मामा ठरला कंसमामा... मृतदेहाचे केले नऊ तुकडे

ती व्यक्ती जिल्हा परिषदेत किती दिवसांपासून येत होती? कोणकोणत्या विभागात काम करीत होती? ही नियुक्ती कोणी केली होती? कोणाला संगणक येत नाही? ही माहिती न घेताच, तो कर्मचारी कामकाजासाठी बसतो तेथील तिघांना नोटीस बजावून सामान्य प्रशासन विभागाने कारवाईचे सोपस्कार पूर्ण केल्याची चर्चा कर्मचाऱ्यांमध्ये आहे.

क्लिक करा ः या सालगड्याचा मुलगा असा झाला मंत्री.. अाता देह झाला चंदनाचा

विशेष म्हणजे, लॉकडाउनमध्येही ती व्यक्ती जिल्हा परिषदेत येत होती. त्यामुळे त्या व्यक्तीकडे जिल्हा परिषदेचे ओळखपत्रही असण्याची शक्‍यता असल्याने, या प्रकरणाची सखोल चौकशी होणे गरजेचे आहे. यासाठी आता मुख्य कार्यकारी अधिकाऱ्यांनी स्वतंत्र अधिकाऱ्याची नियुक्ती करून, या प्रकरणाच्या मुळाशी जाऊन कारवाई करावी, अशी मागणी कर्मचाऱ्यांसह जिल्हा परिषदेच्या सदस्यांकडून होत आहे. 

खासगी व्यक्तीच्या नियुक्ती प्रकरणाची चौकशी करून संबंधितावर कारवाई करावी, याबाबत आपण मुख्य कार्यकारी अधिकाऱ्यांना सूचित केले आहे. ज्यांना संगणक येत नाही, त्यांची इतरत्र बदली करावी. 
- काशिनाथ दाते, सभापती, बांधकाम व पशुसंवर्धन समिती. 

खासगी व्यक्ती जिल्हा परिषदेत कामकाज करीत असल्याची शहानिशा करण्यात येणार आहे. त्यानंतर ही बाब मुख्य कार्यकारी अधिकाऱ्यांच्या निदर्शनास आणून दिली जाईल. 
- विकास साळुंके, अध्यक्ष, जिल्हा परिषद कर्मचारी संघटना , अहमदनगर