अहमदनगर : गावठी पिस्तूल बाळगणाऱ्यास अटक ; स्थानिक गुन्हे अन्वेषण शाखेची कारवाई

अहमदनगर : गावठी पिस्तूल व दोन जिवंत काडतुसे विक्री करण्यासाठी घोडेगाव (ता. नेवासे) येथे घेऊन आलेला आरोपी सचिन वसंतराव कोळेकर (रा. मुक्तापूर, ता. नेवासे) याला स्थानिक गुन्हे अन्वेषण शाखेने सोमवारी (ता. ३१) सापळा लावून जेरबंद केले.

स्थानिक गुन्हे अन्वेषण शाखेचे पोलिस निरीक्षक अनिल कटके यांना खबऱ्याकडून माहिती मिळाली. सचिन वसंतराव कोळेकर (रा. मुक्तापूर, ता. नेवासे) हा एक गावठी पिस्तूल विक्री करण्याच्या उद्देशाने घोडेगावला कृषी उत्पन्न बाजार समिती परिसरात येणार असल्याच्या या माहितीच्या आधारे स्थानिक गुन्हे शाखेचे सहायक पोलिस निरीक्षक सोमनाथ दिवटे, हवालदार मनोहर गोसावी, संदीप घोडके, लक्ष्मण खोकले, शंकर चौधरी, रविकिरण सोनटक्के, देवेंद्र शेलार, सागर ससाणे, आकाश काळे, जालिंदर माने, रोहित येमूल, बबन बेरड यांच्या पथकाने दोन पंचांसह खासगी वाहनाने घोडेगावला जाऊन सापळा लावला.

या ठिकाणी संशयित आरोपी आला असता त्यास पोलिस पथकाने घेराव घालून ताब्यात घेतले. त्याच्या ताब्यातून गावठी पिस्तोल आणि दोन जिवंत काडतुसे जप्त करण्यात आले. पोलिस नाईक ज्ञानेश्‍वर नामदेव शिंदे यांच्या फिर्यादीवरून सोनई पोलिस ठाण्यात गुन्हा दाखल केला. कोळेकर हा सराईत गुन्हेगार आहे. त्याच्याविरुद्ध दरोडा, घातक शस्त्रे बाळगणे, गंभीर दुखापत करणे असे तीन गंभीर गुन्हे दाखल आहेत.