‘मनपा’चा मुख्य लेखाधिकारी ‘लाचलुचपत’च्या सापळ्यात

अहमदनगर : अहमदनगर महापालिकेत मुख्य लेखाधिकारी प्रवीण गोपाळराव मानकर यांना ठेकेदाराच्या कामाचा धनादेश काढण्यासाठी २० हजारांची लाच मागितल्याप्रकरणी लाचलुचपत विभागाने आज अटक केली. एका ठेकेदाराला महापालिकेत केलेल्या कामाची बिले मंजूर करून धनादेश देण्याच्या मोबदल्यात आरोपी मुख्य लेखाधिकारी प्रवीण गोपाळराव मानकर (वय ५२, रा. दिल्ली गेट, मानकर गल्ली, नगर. हल्ली रा. उत्तम टाऊनस्केप, विश्रांतवाडी, पुणे) यांनी संबंधित ठेकेदाराकडे २५ हजार रुपयांच्या लाचेची मागणी केली.

तक्रारदार ठेकेदार यांनी लाचलुचपत प्रतिबंधक विभागाकडे ता. ७ ऑक्‍टोबर रोजी दिलेल्या तक्रारीवरून त्याच दिवशी केलेल्या लाच मागणी पडताळणी करण्यात आली. प्रवीण मानकर यांनी तक्रारदार यांच्याकडे २० हजार रुपयांची मागणी केली. त्याच दिवशी १५ हजार रुपये स्वीकारण्याची संमती दर्शवली. पंचासमक्ष हे बोलणे झाले होते. त्यामुळे आज (बुधवारी) त्यांना ताब्यात घेऊन त्यांच्याविरुद्ध तोफखाना पोलिस ठाण्यामध्ये लाचलुचपत प्रतिबंधक कायद्यानुसार गुन्हा दाखल करण्यात आला. पोलिस उपअधीक्षक हरीश खेडकर यांच्या मार्गदर्शनाखाली निरीक्षक पुष्पा निमसे यांनी ही कारवाई केली.