श्रीगोंद्यात आला बघा मुंबईचा वानवळा 

श्रीगोंदे : मुंबईतील मुलीकडे राहत असलेल्या 85 वर्षीय वृद्ध महिलेला मुलीने मूळ गावी कोंडेगव्हाण येथे आणून सोडले होते. ती वृद्धा कोरोनाबाधित असल्याचा अहवाल आज आल्याने, श्रीगोंदेकरांना पुन्हा मुंबईहून कोरोनाचा वानवळा मिळाला. 

हेही वाचा कोरोना... डरोना... कर्जतमध्ये केली ही व्यवस्था 

कोंडेगव्हाण येथील या आजीमुळे श्रीगोंद्यातील कोरोनाबाधितांचा आकडा तीन झाला आहे. श्रीगोंदे फॅक्‍टरी येथील एकाच कुटुंबातील दोन व्यक्ती कोरोनाबाधित निघाल्या होत्या. याआधी दहा महिन्यांचे मूल आणि आज 85 वर्षांची आजी, अशा सर्वांत कमी आणि सर्वांत जास्त वयाच्या व्यक्ती कोरोनाबाधित असल्याची नोंद तालुक्‍यात झाली. 

आवश्‍य वाचा नगर जिल्ह्यात या मंडळात मुसळधार पाऊस.... 

तहसीलदार महेंद्र माळी म्हणाले, ""त्या आजीच्या घरच्यांकडून मिळालेल्या माहितीनुसार, आजीचा एक मुलगा कोंडेगव्हाण येथे आहे, तर दुसरा मुंबईत पोलिस आहे. आजी त्यांच्या मुंबईतील मुलीकडे होत्या. मुलगी व जावयाने आजीला 27 मे रोजी कोंडेगव्हाणला आणून सोडले. नंतर त्रास होऊ लागल्याने 31 मे रोजी श्रीगोंद्यात क्वारंटाईन करून त्यांचा स्राव नगरला पाठविला होता. तो आज पॉझिटिव्ह आला. कोंडेगव्हाणच्या हद्दी "सील' केल्या असून, तेथील 185 कुटुंबांची आरोग्यतपासणी करण्याचे आदेश दिले आहेत. महिलेच्या घरातील चौघांचीही तपासणी करण्यात येणार आहे.