शनिदर्शन "लिमिटेड'! शनैश्‍वर देवस्थानाचा रोज सहा हजार भाविकांनाच दर्शनाचा निर्णय 

सोनई (अहमदनगर) : कोरोनामुळे आठ महिन्यांपासून बंद असलेले शनिदर्शन सोमवारी सुरू झाले आहे. सुरक्षित अंतर ठेवून रोज फक्त सहा हजार भाविकांना शनिदर्शन दिले जाणार आहे. स्वयंभू शनिमूर्तीपर्यंत पूजा साहित्य नेण्यास भाविकांना परवानगी नसून, फक्त तेलच नेता येणार आहे. 

मुख्यमंत्री उद्धव ठाकरे यांनी राज्यातील मंदिरे व प्रार्थनास्थळे दिवाळी पाडव्यापासून सुरू करण्याचा निर्णय जाहीर केला. व्यावसायिकांनी आज सकाळी फटाक्‍यांची आतषबाजी करीत मिठाईवाटप करून या निर्णयाचे स्वागत केले. दिवसभरात अनेकांनी आपआपल्या दुकानांची साफसफाई केली. भाविकांच्या स्वागतासाठी दुकाने सज्ज झाली आहेत. दर्शनव्यवस्थेसाठी झालेल्या नियोजन बैठकीला कोषाध्यक्ष योगेश बानकर, विश्वस्त आप्पासाहेब शेटे, भागवत बानकर, आदिनाथ शेटे, सहायक कार्यकारी अधिकारी जी. के. दरंदले, व्यवस्थापक संजय बानकर, तांत्रिक अधिकारी नितीन शेटे, सहायक पोलिस निरीक्षक सचिन बागुल आदी उपस्थित होते. 

कोरोनाच्या पार्श्‍वभूमीवर पाच वर्षाखालील मुले व 65 वर्षांपुढील ज्येष्ठांना मंदिरात प्रवेश दिला जाणार नाही. रोज सहा हजार भाविकांनाच दर्शन दिले जाणार आहे. स्वयंभू शनिमूर्तीपर्यंत फक्त तेल नेण्यास परवानगी आहे. श्रीफळ, रूईचा हार, काळे कापड, तसेच सर्व पूजासाहित्य महाद्वारातच काढून घेण्यात येणार आहे. पादत्राणे ठेवण्याची व्यवस्था नाही. हातपाय धुणे, प्रत्येकाचे थर्मल स्कॅनिंग, सॅनिटायझरची सोय केली जाणार आहे. 

हेही वाचा : शिर्डीतील साई मंदिर भाविकांसाठी खुले

पहाटे व सायंकाळच्या आरतीला नोंदणी केलेल्या एका भक्तास आरतीसाठी चौथऱ्यावर थांबता येईल. प्रसादविक्री, भोजनालय व जनसंपर्क कार्यालय काही दिवसांसाठी बंदच ठेवण्याचा निर्णय बैठकीत झाला. नवीन दर्शनपद्धतीसाठी विश्वस्त मंडळाने नियोजन केले आहे. शनिमंदिर बंद असल्याने गाव व परिसराचे पूर्ण अर्थकारण ठप्प झाले होते. आता शनिदर्शन सुरू होत असल्याने, ग्रामस्थ, दुकानदारांसह भाविकांनीही आनंद व्यक्त केला. 

संपादन : अशोक मुरुमकर