श्रीगोंद्यात कुकडी कालवा जेसीबीने लावून फोडला, दरवर्षीच घडते घटना

श्रीगोंदे : "कुकडी'चे आवर्तन अंतिम टप्प्यात असताना तालुक्‍यातील सर्वांत मोठी वितरिका 132चा पोटकालवा काल बुधवारी जेसीबी यंत्र लावून फोडला. अधिकाऱ्यांना याचा थांगपत्ता नव्हता. शेतकरी बचाव कृती समितीचे अध्यक्ष राजेंद्र काकडे यांनी या प्रकाराचा पर्दाफाश केल्यानंतर जलसंपदा विभाग जागा झाला आणि संबंधितांवर कारवाईची भाषा सुरू झाली. 

"कुकडी'चे शेती सिंचनासाठीचे आवर्तन सुरू आहे. शेतकऱ्यांच्या पिकांकडे दुर्लक्ष करून "कुकडी'च्या अधिकारी- कर्मचाऱ्यांनी किलोमीटर 132वरील जोडकालवा श्रीगोंदे शिवारात फोडून एका तलावात पाणी सोडले. या अधिकाऱ्यांच्या विरोधात प्रशासनाने कारवाई केली नाही, तर अधिवेशन काळात मंत्रालयासमोर आत्मदहनाचा इशारा शेतकरी नेते राजेंद्र काकडे यांनी दिला.

हेही वाचा - नेवाशात शेतकऱ्याने पुन्हा पेटवला ऊस

लोणी व्यंकनाथ, घारगाव, पारगाव, श्रीगोंदे, बाबुर्डी, शिरसगाव, म्हातारपिंप्री शिवारातील शेतकरी "कुकडी'च्या पाण्याची आतुरतेने वाट पाहत आहेत. शेतकऱ्यांना थेट पाणी न देता तलावात पाणी सोडण्याचे उद्योग सुरू आहेत. "कुकडी'चे हे आवर्तन फक्त शेती सिंचनासाठी आहे. कोणत्याही तलावात पाणी सोडू नये, असे कालवा सल्लागार समितीच्या बैठकीत ठरले. मात्र, अधिकाऱ्यांनी या निर्णयाला केराची टोपली दाखविली.

दरम्यान, कालवा फोडण्याचा प्रकार काकडे यांनी सोशल मीडियातून समोर आणल्यानंतर जलसंपदा विभागाच्या अधिकाऱ्यांची धावपळ सुरू झाली. कार्यकारी अभियंता स्वप्नील काळे यांनी अधिकाऱ्यांना याबाबत धारेवर धरले. दरम्यान, काकडे यांनी, याप्रकरणी शेतकऱ्यांना बळीचा बकरा करू नका; यात सामील असणाऱ्या अधिकारी व कर्मचाऱ्यांची चौकशी करून त्यांना निलंबित करा, अशी मागणी केली. अहमदनगर