Ahmednagar News : जिल्हा धर्मादाय रुग्णालय समितीवर आमदार राम शिंदे, मोनिका राजळे

अहमदनगर : धर्मादाय रुग्णालयातील आरक्षित खाटा निर्धन आणि दुर्बल घटकातील रुग्णांसाठी पारदर्शक पध्दतीने उपलब्ध करून देण्यासाठी गठित जिल्हास्तरीय समितीवर आमदार राम शिंदे, आमदार मोनिका राजळे व इतर सदस्यांची नियुक्ती करण्यात आली.

याबाबतचा शासन निर्णय विधी व न्याय विभागाने जारी केला आहे. धर्मादाय रुग्णालयात निर्धन व दुर्बल घटकांतील रुग्णांसाठी आरक्षित खाटा पारदर्शी पध्दतीने निर्धन व दुर्बल घटकांतील रुग्णांना उपलब्ध करून देण्यासाठी राज्यस्तरीय विशेष मदत कक्ष स्थापन करण्यात आला आहे.

या मदत कक्षास सहाय्य करण्यासाठी विधी व न्याय विभागाच्या शासन निर्णयान्वये स्थापन जिल्हास्तरीय समिती पुनर्गठित करण्यात आली. या समितीवर जिल्ह्यातील विधानसभा, विधान परिषद सदस्य, वैद्यकीय क्षेत्रातील एक समाजसेवक, वैद्यकीय क्षेत्रातील तज्ज्ञांची नियुक्ती मंत्री विधी व न्याय यांच्या मान्यतेने करण्याची तरतूद करण्यात आली. आमदार शिंदे, आमदार राजळे, गिरीश कुलकर्णी, डॉ. अशोक इथापे, डॉ. सुहास घुले यांचीही निवड करण्यात आली.