साईभक्तांसाठी आनंदाची बातमी ः साई एक्स्प्रेस पुन्हा सुरू होतेय

श्रीरामपूर ः मुंबई ते साईनगर शिर्डी रेल्वे सुरू झाल्यापासून प्रवाशांच्या संख्येत वाढ झाली आहे. नित्यनेमाने शिर्डीत बाबांच्या दर्शनास जाणाऱ्यांचीही सोय झाली आहे. गेल्या वर्षी लॉकडाऊन रेल्वेसेवा विस्कळीत झाली होती. ती पूर्ववत होत आहे.

शिर्डी-दादर एक्‍स्प्रेस रेल्वे आठवड्यातून चार दिवस बेलापूर, पुण्यामार्गे 11 मार्चपासून सुरू करण्याचा निर्णय रेल्वे प्रशासनाने नुकताच जाहीर केला.

हेही वाचा - होता कोण तो, ज्याच्यासाठी गडाख रडले

साईभक्तांसह जिल्ह्यातील प्रवासी नागरिकांच्या सोयीची ही रेल्वे सुरू होत असल्याने, या निर्णयाचे स्वागत होत आहे. रविवारी, मंगळवारी, बुधवारी, गुरुवारी रात्री 8 वाजून 10 मिनिटांनी साईनगर, बेलापूर, नगर, दौंड, पुणे अशी रेल्वे धावणार आहे. 

बेलापूर रेल्वेस्थानकात रात्री 9 वाजून 10 मिनिटे, नगर येथे रात्री 10 वाजून 10 मिनिटे, तर दादर (मुंबई) येथे पहाटे साडेसहा वाजता ही रेल्वे पोचणार आहे. परतीच्या प्रवासात गाडी क्रमांक 01041 दादर, पुणे, साईनगर मंगळवारी, बुधवारी, गुरुवारी, शनिवारी रात्री 11 वाजून 55 मिनिटांनी दादर येथून सुटेल. बेलापूर रेल्वेस्थानकावर सकाळी 7 वाजून 40 मिनिटे, तर साईनगर येथे सकाळी 9 वाजून 25 मिनिटांनी ती पोचणार आहे.