नगरमध्ये शेतकरी हवालदिल; कंटाळून डाळिंबबागांवर कुऱ्हाडी

बोटा (जि.अहमदनगर) : मागील काही दिवसांपासून संगमनेर तालुक्यातील पठार भागातील विविध गावांमध्ये डाळिंबाच्या पिकावर तेल्या व मर रोगांचा प्रादुर्भाव होत आहे. या रोगांपासून बचाव करून डाळिंबे बाजारात नेल्यावर त्यांना भाव मिळत नसल्याने शेतकऱ्यांनी या बागांवर कुऱ्हाडी चालविण्यास सुरवात केली आहे. (pomegranate-farm-destroyed-by-farmer-marathi-news-jpd93)

डाळिंबबागांवर शेतकऱ्याकडून कुऱ्हाडी

संगमनेर तालुक्यात सहा हेक्‍टरपेक्षा अधिक क्षेत्रात डाळिंबबागांची लागवड आहे. बदलणारे हवामान, पावसाची अनिश्‍चितता व विविध रोगांमुळे डाळिंबउत्पादक हवालदिल झाले आहेत. दहा दिवसांपूर्वी तेल्या रोगाला कंटाळून आंबी खालसा येथील डाळिंबउत्पादक महेंद्र घगे यांनी अडीच एकर डाळिंबबागेवर कुऱ्हाड चालवली. तसेच, बोरबन येथील सावळेराम गाडेकर यांनीही डाळिंबास अपेक्षित बाजारभाव व सोबतीला रोगांचा प्रादुर्भाव, अशा संकटांना कंटाळून डाळिंबांच्या २५० झाडांवर कोयता चालविला. पठार भागातील घारगाव, बोटा, तांगडी, बोरबन, अकलापूर, कोठे बुद्रुक, आंबीखालसा, केळेवाडी या गावांचे चाळीस टक्के क्षेत्र डाळिंबबागांनी व्यापले आहे. लागवड ते फळकाढणीपर्यंत एकरी ८० हजार रुपये खर्च येतो. त्यात खुरपणी, छाटणी, सेटिंग, फळांना आवरण, मजुरी यासाठी ४० हजारांपर्यंत खर्च येतो. हा केलेला खर्चही सध्या निघत नाही. त्यामुळे बागांवर कुऱ्हाडी चालविण्याची वेळ शेतकऱ्यांवर येत आहे.

सध्या पठार भागातील डाळिंबबागांवर मोठ्या प्रमाणात तेल्यासह इतर रोगांचा प्रादुर्भाव झालेला आहे. अशा परिस्थितीत बागा वाचविणे अशक्य होत आहे. झाडांवर कोयता चालविणे हा नाइलाजाने घेतलेला निर्णय आहे. - सावळेराम गाडेकर, डाळिंबउत्पादक, बोरबन