सर्वदूर पावसाची हजेरी अन्‌ "या' कामाला आला भलताच वेग !

नगर ः रोहिणी नक्षत्रात पावसाने चांगलेच मनावर घेतले. जिल्ह्यातील 97 पैकी 96 मंडलांत पावसाने सर्वदूर हजेरी लावली. त्यातच हवामान खात्याने यंदा समाधानकारक पाऊस होणार असल्याचे संकेत दिले. त्यामुळे खरिपाचा हंगामाच्या मशागतीच्या कामाला वेग आला असून शेतशिवारात समाधानाचे वातावरण आहे. 

हेही वाचा ः नगर जिल्ह्यातील "या' मंडलांत मुसळधार पाऊस 

खरीप हंगामात यंदा जिल्ह्यात साडेपाच लाख हेक्‍टर क्षेत्रावर पेरणी होणार असल्याचा अंदाज कृषी विभागाने वर्तविला आहे. मृग नक्षत्राच्या मुहूर्तावर पडणारा पाऊस खरिपाच्या हंगामासाठी चांगल्या उत्पन्नाची हमी देतो. कोरोना महामारीच्या संकटातही खरिपाच्या पूर्व मशागतीची कामे सुरू होती. त्यातच बळिराजाचे डोळे पावसाकडे लागले होते. एक जूनचा मुहूर्त गाठत पावसाने जिल्ह्यात आगमन केले. 

जिल्ह्यातील 97 पैकी 83 मंडलांत पावसाने हजेरी लावली होती. काल (मंगळवारी) पावसाने 97 पैकी 96 मंडलांत हजेरी लावल्याने शेतकऱ्यांना दिलासा मिळाला आहे. केवळ पळशी (पारनेर) मंडलात पावसाचे खाते निरंक राहिले आहे. जिल्ह्यातील बहुतांश बाजारपेठात बियाणे, खते आणि पेरणीविषयक वस्तूंच्या खरेदीसाठी शेतकऱ्यांची गर्दी दिसून येत आहे. दरम्यान, शासकीय आकडेवारीनुसार पावसाची सरासरी 22.71 इतकी आहे. 

अवश्‍य वाचा ः "कुकडी' आवर्तनाबाबत सस्पेन्स; पिण्यासाठी की शेतीसाठी? 

तालुकानिहाय पावसाची आकडेवारी (मिलीमीटरमध्ये) 
अकोले-27 
संगमनेर-24 
कोपरगाव-09 
श्रीरामपूर-18 
राहुरी-28.4 
नेवासे-34 
राहाता-05 
नगर-38 
शेवगाव-32 
पाथर्डी-10 
पारनेर-36 
कर्जत-28 
श्रीगोंदे-20.5 
जामखेड-08