राज्यात 3 दिवसात 13 जणांना जलसमाधी; जाणून घ्या कुठे काय झालं?

अहमदनगर- राज्यात तीन दिवसात तेरा जणांना जलसमाधी मिळाली आहे. प्रवरा नदीत काल बुडालेल्या दोन लोकांचा शोध घेण्यासाठी निघालेली एसडीआरएफची बोट उलटली आहे. यात तीन जवानांचा मृत्यू झाल्याची माहिती आहे. प्रवरा नदीमध्ये दोघेजण बुडाले होते. त्यांना वाचवण्यासाठी एसडीआरएफचे पथक गेले होते. यातील एसडीआरएफचे सहा जवान बुडाले आहेत. अकोले तालुक्यातील सुगाव गावा जवळचीही घटना आहे.

आपात्कालीन परिस्थितीत बचावकार्यासाठी एसडीआरएफच्या जवानांना प्राचारण करण्यात येतं. पण, त्यांचाच मृत्यू झाला असल्याने हळहळ व्यक्त केली जात आहे. सहा बुडालेल्या जवानांपैकी चार जवानांना बाहेर काढण्यात आले. त्यातील तीन जवानांचा मृत्यू झालाय, तर एकाची प्रकृती स्थिर आहे. दोघांचा शोध सुरु असल्याची माहिती स्थानिक प्रशासनाने दिली आहे.

काल प्रवरा नदीत बुडालेल्या एकाचा मृतदेह सापडला होता. आणखी एका मृतदेहाचा शोध सुरु होता. यासाठी एसडीआरएफचे पथक बोटीसह पाण्यात उतरले होते. सकाळी सहा वाजता हे बचावकार्य सुरु करण्यात आलं होतं. बचावकार्य करत असताना बोट उलटली अन् त्यापैकी सहा जवान बुडाले. त्यांना बाहेर काढून हॉस्पिटलमध्ये दाखल करण्यात आले. यात तिघांचा मृत्यू झालाय, तर एकाची प्रकृती स्थिर असल्याची माहिती आहे.

उजनी धरणात पाच जणांचा मृत्यू

उजनी धरणाच्या जलाशयात मंगळवारी प्रवासी वाहतूक करणारी बोट उलटून झालेल्या अपघातामध्ये करमाळा तालुक्यातील कुगाव आणि झरे या गावातील बेपत्ता झालेले सर्व ६ प्रवाशांचे मृतदेह तब्बल ३६ तासानंतर नैसर्गिकरित्याच पाण्यावर तरंगत वर आले. सदर मृतदेह एनडीआरएफच्या जवानांनी जलाशयातून काढत पुढील कार्यवाहीसाठी करमाळा येथे रुग्णवाहिकेद्वारे पाठवाले. दरम्यान मृतदेह पाहताच नातेवाईकांचा हंबरडा काळजाचा घाव घेत होता.

एकदंरीत गेले दोन दिवस महाराष्ट्रासाठी वाईट ठरले. उजनी धरणात बुडून सहा जणांचा मृत्यू झाला. त्यानंतर प्रवरा नदीत काल दोघेजण बुडाले. त्यांना वाचवण्यासाठी गेलेल्या तीन जवानांचा मृत्यू झालाय. तर आणखी दोघांचा शोध सुरु आहे.