Pune Porsche Accident : पुण्यातील आरोपीला व्हीआयपी ट्रिटमेंट कशी? माजी गृहमंत्र्यांचा सवाल

नवी दिल्ली : भरधाव गाडी चालवून दोन निष्पाप लोकांना जीव घेणाऱ्या वेदांत अग्रवाल या आरोपीला पिझ्झा व इतर व्हीआयपी ट्रिटमेंट देण्यासाठी राज्य सरकारमधील कोणत्या वरिष्ठांनी आदेश दिले होते, असा सवाल राज्याचे माजी गृहमंत्री अनिल देशमुख यांनी केला आहे.

दिल्लीत काही खासगी कामानिमित्त आले असताना प्रसार माध्यमांशी बोलताना ते म्हणाले, वेदांत अग्रवालने पबमध्ये दारू पिऊन वेगाने गाडी चालविली. यात दोघांना प्राणास मुकावे लागले. यानंतरही या आरोपीला तात्काळ जामीन मिळाला. जामीनाच्या काळात त्याला पिझ्झा पुरविण्यात आला. एखाद्या व्हीआयपीप्रमाणे त्याची बडदास्त ठेवण्यात आली होती. गाडीखाली कुत्रा आले तरी विरोधक माझा राजीनामा मागतात, असे उपमुख्यमंत्री देवेंद्र फडणवीस यांनी म्हटले आहे. या अपघातात तर दोन निष्पाप लोकांचे प्राण गेले आहे. मग उपमुख्यमंत्री फडणवीस जबाबदारी स्वीकारून राजीनामा देतील, असा सवालही अनिल देशमुख यांनी केला आहे.