शिक्षकांच्या चाचणीनंतरच आठवीपर्यंतचे वर्ग भरणार

अहमदनगर : शिक्षण विभागाने नववी ते बारावीपर्यंतचे वर्ग सुरू केल्यावर, आता 27 जानेवारीपासून पाचवी ते आठवीपर्यंतच्या शाळा सुरू करण्यास शासनाने हिरवा कंदील दाखविला आहे. त्यामुळे पाचवी ते आठवीपर्यंतच्या 6614 शिक्षकांच्या कोरोनाचाचणी होणार आहे; परंतु या चाचण्यांचा अहवाल आल्यानंतर वर्ग भरविले जाणार आहेत. 

हे ही वाचा : निलेश लंके यांनी आमदार पदाचा दर्जाच घालवला : सुजित झावरे

राज्यात 24 नोव्हेंबरपासून नववी ते बारावीपर्यंतचे वर्ग सुरू करण्याचा निर्णय झाला. टप्प्याटप्प्याने राज्यातील शाळा सुरू झाल्या आहेत. मात्र, त्याअगोदर शिक्षकांची कोरोनाचाचणी करण्यात आली. कोरोनाचाचणीचे अहवाल जिल्ह्यातील शिक्षकांना वेळेत मिळण्यासाठी जिल्हा रुग्णालयाचे उंबरठे झिजविण्याची वेळ आली होती.

हे ही वाचा : अंगणवाड्या-शाळांना नळजोड; सरकारचे जलमिशन अभियान, प्रत्येक घराला नळाद्वारे पाणी

अनेकांना घशातील स्त्राव दिल्यानंतर तब्बल दहा दिवसांनी अहवाल मिळाले. त्यामुळे यावेळी तरी प्रशासनाने नियोजन करून शिक्षकांना कोरोना चाचणी करावी व तपासणीनंतर तातडीने दुसऱ्या दिवशी अहवाल मिळावेत, अशी मागणी होत आहे. पाचवी ते आठवीपर्यंत जिल्ह्यात 2003 शाळा असून, 3 लाख 7 हजार 777 विद्यार्थीसंख्या आहे. त्यांना 6614 शिक्षक अध्यापनाचे काम करतात.