माहेराहून निघाली तुळजा भवानीचा पालखी

राहुरी : राहुरीची माहेरवाशीण व महाराष्ट्राचे आराध्य दैवत तुळजाभवानीमातेच्या पालखीची खांद्यावरून मिरवणुकीची परंपरा यंदा कोरोनामुळे खंडित झाली.

अत्यंत साध्या पद्धतीने काल (शनिवारी) तुळजापूरच्या दिशेने पालखी बुऱ्हाणनगरकडे (नगर) रवाना करण्यात आली. 
बाजार समितीचे सभापती अरुण तनपुरे व सुजाता तनपुरे यांच्या हस्ते पालखीपूजन होऊन आरती करण्यात आली.

या वेळी हर्ष तनपुरे, ताराचंद तनपुरे, राजेंद्र वाडेकर, नंदकुमार तनपुरे, अण्णासाहेब शेटे, अरुण ठोकळे, संतोष आघाव, सुरेश धोत्रे, ऍड. राहुल शेटे, संजय पन्हाळे, दीपक साळवे, अमोल जंगम, सचिन ढवळे, सुनील दायमा, पांडू उदावंत यांच्यासह भाविक या वेळी उपस्थित होते.

तुळजापूरमधील नवरात्रोत्सवासाठी भवानीमातेची पालखी तयार करण्याची परंपरा येथे आहे. पालखीचा दांडा बुऱ्हाणनगर येथून येतो. पालखी तयार करण्याचा मान तेली, सुतार, माळी, लोहार समाजांना आहे. मुस्लिम समाजाचेही यात योगदान असते.

पालखी तयार झाल्यानंतर पानाचा विडा देण्याचा मान गोरख तांबोळी कुटुंबाला, तर आरतीचा मान अण्णासाहेब शेटे यांच्या कुटुंबाला आहे. शहरातून पालखीची मिरवणूक काढली जाते. प्रत्येक मानकरी पालखी घरासमोर आल्यावर साडी-चोळी, श्रीफळाने ओटी भरतात. या वर्षी मात्र कोरोनामुळे मिरवणुकीची परंपरा खंडित झाली. 

संपादन - अशोक निंबाळकर