महिला आयोगाच्या अध्यक्षांना धमकी देणाऱ्यास अटक

अहमदनगर : राज्य महिला आयोगाच्या अध्यक्षा रूपाली चाकणकर यांना जीवे मारण्याची धमकी देणाऱ्या व्यक्तीला नगर तालुका पोलिसांनत आज सकाळी चिंचोडी पाटील (ता. नगर) येथून ताब्यात घेतले आहे. भाऊसाहेब रामदास शिंदे (रा. भेंडा ता. नेवासा) असे त्या व्यक्तीचे नाव आहे. राज्य महिला आयोगाच्या अध्यक्षा रूपाली चाकणकर कार्यालयात असताना त्यांना धमकीचा फोन आला होता.

पुढच्या २४ तासांत रुपाली चाकणकर यांना जीवे मारु, असा हा धमकीचा फोन होता. अहमदनगरमधील व्यक्तीने फोन केल्याची माहिती मिळताच पोलिसांनी तपासाची चक्रे फिरली. सहायक निरीक्षक राजेंद्र सानप व त्यांच्या पथकाने चिंचोडी पाटील गावातून शिंदे याला ताब्यात घेतले आहे. पुणे गुन्हे शाखेचे पथक त्याला ताब्यात घेण्यासाठी निघाले आहे. शिंदे हा पूर्वी मुंबईला परिचारक म्हणून काम करत होता. त्याला तेथून काढून टाकण्यात आलेले आहे.