पोलिसांच्या तक्रारी सोडविण्यासाठी ‘समाधान’ मिळालं

अकोला  ः लोकांच्या तक्रारी सोडविण्यासाठी २४ तास राबणाऱ्या पोलिस अधिकारी, कर्मचाऱ्यांच्या समस्यांवर तातडीने निर्णय घेवून त्या सोडविण्यासाठी जिल्हा पोलिस अधीक्षक जी. श्रीधर यांच्या पुढाकाराने ‘समाधान’ योजना राबविली जात आहे.

पोलिस कर्मचारी, अधिकाऱ्यांना काम करताना अनेक अडचणींचा सामना करावा लागतो. त्यात प्रशासकीय स्तरावरील समस्यांचाही समावेश असतो. त्या सोडवून घेण्यासाठी प्रत्येकवेळी पोलिस अधीक्षकांना भेट शक्य होईल, असे नाही. पोलिस अधीक्षकांनाही कामाचा व्याप बघता प्रत्येकवेळी पोलिस कर्मचारी, अधिकाऱ्यांची भेट घेणे शक्य होत नाही.

या अडचणी बघता व पोलिसांच्या समस्या तातडीने वेळीच सोडविण्यासाठी पोलिस महासंचालकांनी राज्यात पाच वर्षांपूर्वी समाधान योजना राबविण्यास सुरुवात केली होती. त्याची अंमलबजावणी सर्वच जिल्हा पोलिस अधीक्षकांनी करणे आवश्यक होते. त्यासाठी जिल्हा पोलिस अधीक्षक कार्यालयात यंत्रणाही उभी करण्यात आली.

• अभ्यासक्रमाच्या कपातीवरून शिक्षकांचा गोंधळ

मात्र त्याचा उपयोगच होत नव्हता.अकोला जिल्ह्यात नव्याने रूजू झालेले पोलिस अधीक्षक जी. श्रीधर यांनी बीड येथे असताना ही योजना कार्यान्वित केली होती. अकोल्यात रूजू झाल्यानंतरही त्यांनी जिल्ह्यातील पोलिसांच्या समस्या सोडविण्यासाठी तातडीने सोडविता याव्यात म्हणून समाधान योजना राबविण्याचा निर्णय घेतला आहे.

कुठे मांडता येतील समस्या?
जिल्हा पोलिस अधीक्षकांनी सुरू केलेल्या समाधान योजनेत पोलिसांना त्यांच्या तक्रारी व समस्या मांडण्यासाठी पोलिस अधीक्षकांची थेट भेट घेण्याची गरज नाही. पोलिसांना त्यांच्या तक्रारी किंवा समस्या पोलिस अधीक्षक कार्यालयातील ८८०५४६११०० या व्हॉटस् ॲप क्रमांकावर किंवा ज्यांना स्मार्ट फोन हाताळता येत नाही त्यांनी ०७२४-२४४५३०५ या लँडलाईन क्रमांकावर फोन करून मांडता येणार आहेत.

• अनुसूचित जातीच्या ६० लाखांहून अधिक विद्यार्थ्यांची शिष्यवृत्ती बंद

जिल्ह्यात प्रथमच अंमलबजावणी
पोलिस अधीक्षक कार्यालयातर्फे समाधान योजना जिल्ह्यात प्रथमच राबविली जात आहे. पाच वर्षांपूर्वी सुरू झालेल्या या योजनेचा लाभ जिल्ह्यातील पोलिस अधिकारी व कर्मचाऱ्यांना आता घेता येणार आहे.

डीजी ऑफिसतर्फे पाच वर्षांपूर्वी समाधान योजना सुरू करण्यात आली होती. बीड येथे असताना ही योजना मी राबविली. अकोल्यातही या योजनेची यंत्रणा होती. ती मी आल्यानंतर कार्यान्वित केली आहे. आठवड्यातून एकदा मी स्वतः त्याचा आढावा घेतो व तक्रारी निकाली काढून पोलिसांच्या समस्या सोडविण्याचा प्रयत्न करीत आहे.
- जी. श्रीधर, पोलिस अधीक्षक, अकोला

(संपादन - विवेक मेतकर)