विजेचा धक्का लागून खासगी वायरमनचा मृत्यू

अनिल दंदी
Monday, 19 October 2020

विद्युत खांबावर दुरुस्ती करताना वीजप्रवाह सुरूच असल्याने विजेचा धक्का बसून खासगी वायरमनचा जागीच मृत्यू झाल्याची घटना रविवारी (ता. १८) पोलिस ठाण्याच्या हद्दीतील मांजरी येथे सकाळी १० वाजण्याच्या सुमारास घडली. बळीराम काशिराम वाघमारे वय (वय ५६) असे मृत्यू झालेल्या वायरमनचे नाव आहे.

बाळापूर (जि.अकोला) : विद्युत खांबावर दुरुस्ती करताना वीजप्रवाह सुरूच असल्याने विजेचा धक्का बसून खासगी वायरमनचा जागीच मृत्यू झाल्याची घटना रविवारी (ता. १८) पोलिस ठाण्याच्या हद्दीतील मांजरी येथे सकाळी १० वाजण्याच्या सुमारास घडली. बळीराम काशिराम वाघमारे वय (वय ५६) असे मृत्यू झालेल्या वायरमनचे नाव आहे.

बळीराम हा अनेक वर्षांपासून गावात विज जोडणी व दुरुस्तीचे काम करतो. आज सकाळच्या सुमारास गावातील एका व्यक्तीच्या घरातील विद्युत पुरवठा खंडित झाला होता. त्यामुळे तो खांबावर चढला. खांबावर दुरुस्तीचे काम करत असताना तारेत वीजप्रवाह सुरू असल्याने विजेचा प्रचंड धक्का लागून तो जागीच ठार झाला.

विशेष म्हणजे बळीरामचे कुटुंबीय त्याला सोडून बाहेगावी राहत असल्याने तो एकटाच मांजरी येथे राहत होता. त्यामुळे सर्वत्र हळहळ व्यक्त होत आहे. घटनेची माहिती मिळताच उरळ पोलिस घटनास्थळी पोहचले व मृतदेह उत्तरीय तपासणीसाठी रवाना केला. या प्रकरणी उरळ पोलिस ठाण्यात आकस्मिक मृत्यूची नोंद करण्यात आली आहे.

(संपादन - विवेक मेतकर)


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Akola News: Wireman dies of electric shock