Akola : कृषी विद्यापीठाच्या शिवार फेरीला उदंड प्रतिसाद

अकोला : डॉ. पंजाबराव देशमुख कृषी विद्यापीठाच्या स्थापना दिनाच्या निमित्ताने आयोजित तीन दिवसीय शिवार फेरी कार्यक्रमाची गुरुवारी (ता.२०) सांगता झाली. तिसऱ्या दिवशी वाशीम, अमरावती, भंडारा व गोंदिया या चार जिल्ह्यांमधील शेतकऱ्यांनी शिवार फेरीच्या नियोजित स्थळी भेट दिली असून, तीन दिवसात संपूर्ण विदर्भातून शिवार फेरीला १० हजार शेतकऱ्यांनी उपस्थित राहून विद्यापीठाचे कृषी तंत्रज्ञान जाणून घेतले.

कुलगुरू डॉ. शरदराव गडाख यांच्या हस्ते हिरवी झेंडी दाखवून शेतकऱ्यांच्या वाहनांना शिवार फेरीसाठी रवाना करण्यात आले. तत्पूर्वी विद्यापीठाच्या ५३ व्या वर्धापन दिनाच्या निमित्ताने कुलगुरू डॉ. शरदराव गडाख यांच्या हस्ते प्रशासकीय भवनासमोरील प्रांगणात ध्वजारोहण व विद्यापीठ गीताने विद्यापीठ स्थापना दिन साजरा करण्यात आला.

याप्रसंगी संचालक संशोधन डॉ. व्ही.के. खर्चे, संचालक विस्तार शिक्षण डॉ. धनराज उंदीरवाडे, संचालक शिक्षण तथा अधिष्ठाता कृषी डॉ. श्यामसुंदर माने, अधिष्ठाता कृषी अभियांत्रिकी डॉ. सुधीर वडतकर, अधिष्ठाता उद्यानविद्या डॉ. देवानंद पंचभाई, कुलसचिव डॉ. सुरेंद्र काळबांडे आदिंची उपस्थिती होती. शिवार फेरीदरम्यान विद्यापीठ कार्यकारणी सदस्य विठ्ठल सरप व डॉ.व्ही.के. माहुरकर, विभागीय कृषी सहसंचालक किसन मुळे (अमरावती) व राजेंद्र साबळे (नागपूर) तसेच कृषी कीर्तनकार महादेवराव भुईभार, जिल्हाधिकारी निमा अरोरा यांची प्रमुख उपस्थिती लाभली.

कृषी महाविद्यालय अकोलाच्या के.आर. ठाकरे सभागृहात कुलगुरू डॉ. शरद गडाख यांचे अध्यक्षतेत आयोजित चर्चासत्रादरम्यान विद्यापीठ शास्त्रज्ञांनी शेतकऱ्यांच्या शंकांचे समाधान केले. चर्चासत्रा दरम्यान डॉ. शंभरकर यांनी सूत्रसंचालन केले तर, डॉ. राजेश्वर काटोले, डॉ. उमेश चिंचमलातपुरे यांनी उपस्थितांचे आभार मानले.

शिवारफेरीदरम्यान विद्यापीठ निर्मित पीकेव्ही हाय २, पीकेव्ही जे.के.ए.एल. ११६ बिजी २, सुवर्ण शुभ्रा, एकेएच ९९१६, एकेएच ८८२८ या अमेरिकन वाणांची तसेच एएचएच ०८१ बीटी, रजत बीटी या सुधारित वाणांचा तर, देशी वाणांमध्ये एके ७, एके ८८०१ या वाणांचे सुधारित लागवड तंत्र शेतकऱ्यांना प्रत्यक्षात दाखवण्यात आले.