कापसाच्या भावात सतत घसरण; शेतकऱ्यांच्‍या चिंतेत वाढ

मलकापूर (जि. अकोला) - ऑक्टोबर महिन्यात नऊ हजार रुपयांपर्यंत प्रति क्विंटल भाव गाठलेल्या कापसाच्या भावात सध्या मागील पंधरवाड्यापासून सतत घसरण होत असल्याने कापूस उत्पादक शेतकरी हवालदील झाले आहेत. शेतकऱ्यांनी आणखी भाव वाढेल म्हणून कापूस घरातच साठवून ठेवला आहे. परंतु, डिसेंबर उजाडला असला तरी मलकापूर येथील बाजारपेठेत खासगी व्यापाऱ्याकडून ७ हजार ७०० रूपये प्रति क्विंटल प्रमाणे कापसाची खरेदी होत अाहे. अगोदरच यंदा मलकापूर तालुक्यात अतिवृष्टी आणि सततच्या पावसामुळे कापसाचे पीक हातचे गेले आहे. त्यात आता आणखी दिवसेंदिवस कमी होत असलेले कापसाचे भाव हे नक्कीच शेतकऱ्यांची चिंता वाढविणारे आहे. दरम्यान कापसाच्या भावात आठ दिवसात मोठ्या प्रमाणात घसरण झाली आहे.

तालुक्यातील शेतकरी दरवर्षी नगदी पिक म्हणून कापसाचे उत्पादन घेत असतो. परंतु ऐन कपाशीला कैऱ्या लागण्याच्या काळातच सततधार पावसाने सुरूवात केल्याने कपाशीच्या उत्पादनात मोठी घट झाली आहे. शिवाय अनेक शेतकऱ्यांनी कपाशीच्या शेतात तुंबलेले पाणी मोटारीद्वारे बाहेर काढुन कपाशी पिक जगविण्यासाठी शर्थीचे प्रयत्न करीत कपाशीचे पिक हातात आणले. परंतु, त्यातही कापुस वेचायलाही मजुर सापडत नसल्याने शेतकऱ्यांनी अतिरिक्त भाडे देत विदर्भातील मजुर आयात करीत पाच ते सहा रुपये किलो प्रमाणे मजुरी देत कापूस घरात आणला आहे.

अनेक ठिकाणी तर एका वेचणीत कपाशीची उलगंवाडी झाली आहे. ज्या ठिकाणी पंचवीस क्विंटल कापूस व्हायचा त्या ठिकाणी शेतकऱ्यांना दहा क्विंटलवरच समाधान मानावे लागले आहे. दिवाळीच्या अगोदर खासगी व्यापाऱ्यांकडून कापुस खरेदीला सुरूवात करण्यात आली होती. सुरूवातीला पाच हजार रुपये प्रति क्विंटल खरेदी होणाऱ्या कापसाचे भाव नऊ हजार रुपयापर्यंत जाऊन पोहचले होते.

त्यामुळे शेतकऱ्यांना कापसाचे आणखी भाव वाढतील म्हणून कापुस घरातच साठवून ठेवला आहे.परंतू, सध्या दिवसेंदिवस कापसाच्या भावात घसरण होत चालली असल्याने शेतकरी वर्गात नाराजीचा सुर उमटत आहे. शेतकऱ्यांचे पांढरे सोने म्हणून ओळख असलेले हे पांढरे सोने घरी आणण्याकरिता शेतकऱ्यांना लागवडीपासून ते कापूस घरी आणेपर्यंत मोठा खटाटोप करावा लागला आहे. मजुरांची विणवणी करुन कापुस वेचावा लागला आहे. यातच अतिवृष्टीमुळे कापसाच्या उत्पादनात देखील घट झाली आहे.