Crime News : अल्पवयीन मुलाकडून मद्यपी बापाचा खून

अकोला : छत्तीसगढमधिल झाडू तयार करणारे कारागीर अकोला येथे वास्तव्यास आहेत. त्यापैकीच एका कुटुंबातील वाद विकोपाला जाऊन अल्पवयीन मुलाने व्यसनाधीन जन्मात्याच्या सततच्या त्रासाला कंटाळून त्याचा कायमचा संपविल्याची घटना मंगळवारी दुपारी घडली. या घटनेतील मृतकाचे नाव सुनील शिकारी आहे.

अकोला शहरातील गीतानगर भागातील मानव शोरुमच्या बाजूला छत्तिसगढमधिल झाडू तयार करणाऱ्या कारगिरांची तात्पुरती वस्ती आहे. त्यापैकीच एक असलेल्या सुनील शिकारी हा पत्नी व मुलांसोबत राहत होता. तो परिवारासह छत्तीसगडहून अकोल्यात झाडू तयार करून विक्री करण्यासाठी आलो होता.

सोमवारी (ता.१३) रात्री या परिवारात वाद झाला. त्यानंतर मंगळवारी दुपारीसुद्धा पुन्हा वाद उफाळून आला. त्यात संतप्त अल्पवयीन मुलाने चाकूने वार करून पित्याला ठार केले. पोलिसांनी मारेकरी मुलाला आणि त्याच्या आईला ताब्यात घेतले आहे. या प्रकरणाचा तपास जुने शहर पोलिस स्टेशनचे पोलिस निरीक्षक सेवानंद वानखडे करीत आहेत.