श्रीगजानन महाराज संस्थानचे अध्वर्यू शिवशंकरभाऊ पाटील यांचे निधन

शेगाव (जि. बुलडाणा) ः आपल्या कार्यकर्तृत्वाने संतनगरी शेगावचे नाव जगभरात पोहोचविणारे आध्यात्मिक सेवेचे दीपस्तंभ, ‘श्रीं’च्या विचारांना अनुसरून मानवतेसाठी आयुष्य वेचणारे श्री गजानन महाराज संस्थानचे व्यवस्थापकीय विश्वस्त श्री. शिवशंकरभाऊ सुकदेव पाटील यांनी बुधवारी (ता. ४ ऑगस्ट) सायंकाळी ५.३० वाजताच्या सुमारास देह ठेवला. त्यांच्या निधनाने संपूर्ण विदर्भासह देश-विदेशातील गजानन भक्तांवर शोककळा पसरली आहे. त्यांच्या पार्थिवावर सायंकाळी सात वाजता घरासमोरील शेतातच अंत्यसंस्कार करण्यात आले.

गेल्या काही दिवसांपासून ते आजारी होते. गेल्या दोन-तीन दिवसांपासून त्यांची प्रकृती बरीच खालावली होती. त्यांच्या इच्छेनुसार त्यांच्यावर घरीच उपचार सुरू होते. बुधवारी दुपारी त्यांची प्रकृती आणखी खालावली आणि सायंकाळी पाच वाजता त्यांची प्राणज्योत मालवली. शिवशंकरभाऊ यांच्या मागे पत्नी, दोन मुले, तीन मुली, नातवंडे आणि बराच आप्त परिवार आहे. पाटील कुटुंबियांनी शिवशंकरभाऊंच्या निधनाची माहिती अधिकृतपणे जाहीर करून तसा शोकसंदेश वजा सूचनाफलक घराबाहेर लावला. सर्वांनी आपल्या घरूनच भाऊंना श्रद्धांजली अर्पण करावी, अशा आशयाचे आवाहन भाऊंचे सुपूत्र निळकंठ व श्रीकांत पाटील यांनी केले. त्यांच्या निधनाचे वृत्त समजताच प्रतिष्ठित व्यक्ती आणि शासन प्रशासनातील वरिष्ठ अधिकाऱ्यांनी त्यांच्या घरी जावून श्रद्धांजली अर्पण केली. शेगावातील नागरिकांनी दुकाने बंद ठेवून त्यांना श्रद्धांजली वाहिली.

अंत्यसंस्कार शासनाने ठरवून दिलेल्या नियमाप्रमाणे आजच सायंकाळी ७ वाजता पार पडला. करोनाची परिस्थिती असल्याने नातलग व मोजक्या लोकांच्या उपस्थितीतचबाळापूर रोडवरील त्यांच्या निवासस्थानासमोरील शेतात अंतिम संस्कार पार पडले. शिवशंकरभाऊ यांचे पुत्र निळकंठदादा पाटील व श्रीकांतदादा पाटील यांनी मुखाग्नी दिला.

जीवन परिचय

कर्मयोगी शिवशंकरभाऊ सुकदेव गणेश पाटील उपाख्य भाऊ यांचा जन्म १२ जानेवारी १९४० मधे झाला आहे. श्री गजानन महाराज संस्थानचे सन ३१-८-१९६२ विश्वस्त म्हणून कार्यरत आहेत. सन १९६९ ते १९९० पर्यंत ते गजानन महाराज संस्थानचे ४० वर्ष अध्यक्ष म्हणून कार्यरत होते. तसेच श्री गजानन शिक्षण संस्थेचे अध्यक्ष म्हणून कार्यरत आहेत. राजकीय कार्यकाळ बघता शिवशंकरभाऊ शेगाव नगरपालिकेचे सन १९७६ ते ८० या कालावधीत नगराध्यक्ष सुद्धा रहिलेले आहेत. श्री संत गजानन महाराज संस्थानचा निस्वार्थ कारभार सांभाळत असताना संस्थानच्या माध्यमातून शिवशंकरभाऊंनी शैक्षणिक, सामाजिक, धार्मिक असे अनेक उपक्रम राबविले. त्यामुळेच भाविकांसह जनतेने त्यांना कर्मयोगी उपाधीने सन्मानित केले. वयाच्या अठराव्या शिवशंकरभाऊ मंदिर व्यवस्थापनाच्या कार्यात सामील झाले. श्रद्धा, विश्वास आणि भक्ती या त्रिसूत्री नुसार काम करत शिवशंकरभाऊंनी मंदिर व्यवस्थापनाचे एक उत्कृष्ट उदाहरण जगासमोर ठेवले आहे. संस्थानच्या या अवाढव्य कारभाराचे नियोजन आणि नियंत्रण करण्याची शिवशंकरभाऊंची निस्वार्थ शैली जगभरातल्या अर्थतज्ञ, नियोजन तज्ज्ञांसाठी अभ्यासाचा विषय ठरली आहे.