अकोला : पशुवैद्यकीय दवाखान्यात औषधांचा तुटवडा

तेल्हारा : स्थानिक पशुवैद्यकीय दवाखान्यामध्ये अनेक प्रकारांच्या औषधांचा तुटवडा निर्माण झाल्यामुळे शेतकऱ्यांना आपल्या जनावरांसाठी आवश्यक औषधांसाठी भटकंती करावी लागत आहे.

तेल्हारा येथील पशुवैद्यकीय दवाखान्यामध्ये गत अनेक महिन्यांपासून जनावरांसाठी अत्यंत आवश्यक असलेल्या औषधांचा तुटवडा निर्माण झाल्यामुळे पशुपालन करणाऱ्या बांधवांना आपल्या जनावरांसाठी आवश्यक औषधांसाठी भटकंती करावी लागत आहे. पशुवैद्यकीय दवाखान्यामध्ये गोचिडांची औषध, जंताची औषध, चाटण गोटा, कॅल्शियम पावडर इत्यादी अनेक प्रकारच्या औषधी नसल्यामुळे पशुपालन करणाऱ्यांना आपले पशू आजारी पडले असता, त्यांना औषधे कुठून आणायचे? असा प्रश्न निर्माण झाला आहे.

बाहेरून औषध आणायची असल्यास मोठी किंमत मोजावी लागत आहे. त्यामुळे पशुपालन करणाऱ्यांना व शेतकरी बांधवांना मोठे आर्थिक नुकसान सहन करावे लागत आहे. तरी, संबंधित विभागाच्या वरिष्ठ अधिकाऱ्यांनी तेल्हारा येथील पशुवैद्यकीय दवाखान्यामध्ये आवश्यक औषधांचा पुरवठा करावा अशी, मागणी पशु पालक व शेतकरी बांधवांकडून होत आहे.

"तेल्हारा येथील पशुवैद्यकीय दवाखान्यामध्ये काही औषधांचा तुटवडा असून, औषधी मिळण्याकरिता वरिष्ठांकडे मागणी करण्यात आली आहे."

-डॉ.एम. ए. दांदळे, पशुधन विकास अधिकारी.

"तेल्हारा येथील पशुवैद्यकीय दवाखान्यामध्ये अनेक प्रकारच्या महत्त्वाच्या औषधी नसल्यामुळे आमच्या जनावरांकरिता औषधी आणायच्या कुठून ? असा प्रश्न निर्माण झाला असून, बाहेरून महागडे औषध आणावे लागत असल्यामुळे मोठे आर्थिक नुकसान होत आहे. तरी, वरिष्ठांनी याची दखल घ्यावी."

-रवींद्र म्हैसने, शेतकरी.