अकोला : पहिला डोस घेणाऱ्यांची संख्या १० लाखांवर

अकोला : कोरोना लसीकरण अतिशय वेगाने करण्यात येत असल्याने मंगळवारी (ता. ३०) जिल्ह्यात २५ हजारांपेक्षा अधिक म्हणजेच आतापर्यंतचे सर्वाधिक लसीकरण करण्यात आले. त्यासोबतच पहिला डोस घेणाऱ्यांची संख्या सुद्धा दहा लाखांवर पोहचल्याने आरोग्य विभागासह इतर विभागांमार्फत करण्यात येत असलेले प्रयत्न यशस्वी होत असल्याचे दिसून येत आहेत.

कोरोना विषाणू विरोधातील लढ्यात कोरोना प्रतिबंधात्मक लसीकरणाला विशेष महत्व आहे. पहिल्या लाटेनंतर लसीकरण मोहीम सुरू झाल्यापासून आतापर्यंत आरोग्य विभागामार्फत नागरिकांच्या लसीकरणावर जोर देण्यात येत आहे. अधिकाधिक नागरिकांनी लस घ्यावी यासाठी नागरिकांना लस सुद्धा मोफत देण्यात येत आहे. कोरोनाच्या दुसऱ्या लाटेमध्ये लस घेणाऱ्यांवर विषाणूचा हल्ला झाल्यानंतर सुद्धा लसवंताला फारसा प्रभाव न झाल्याचे तज्ज्ञांचे म्हणने आहे. त्यामुळे आरोग्य विभागामार्फत लसीकरणासाठी प्रयत्न करण्यात येत आहेत.

दरम्यान कोरोनाची तिसरी लाट येणाऱ्या शक्यता सुद्धा आरोग्य विभागाने व्यक्त केली आहे. सदर लाट थोपवण्यासाठी लसीकरण हाच एकमात्र उपाय असल्याचे सांगितल्या जात आहे. त्यामुळे लसीकरणाची गती वाढवण्यासाठी व अधिकाधिक नागरिकांना लस मिळावी यासाठी राज्यासह जिल्ह्यात ८ ते १४ ऑक्टोबर या कालावधीत मिशन कवच कुंडल अभियान राबविण्यात आले. त्यामध्ये दररोज किमान २० हजार नागरिकांचे लसीकरण करण्याचे उद्दिष्ट समोर ठेवण्यात आले होते. याव्यतिरिक्त प्रत्येक शासकीय कर्मचाऱ्याचे योगदान अभियानात घेण्यात आले. त्यामुळे मंगळवारी (ता. ३०) जिल्ह्यातील पहिला डोस घेणाऱ्यांची संख्या दहा लाखांवर पोहचली. त्यासोबत मंगळवारीच २५ हजारांवर नागरिकांनी लस घेतल्याची नोंद पहिल्यांदाच करण्यात आली.

असे आहे आतापर्यंतचे सर्वाधिक लसीकरण

• १३ नोव्हेंबर - १९ हजार ४९०

• २९ नोव्हेंबर - २२ हजार १६०

• ३० नोव्हेंबर - २५ हजार २२३

एकूण लसीकरण

• पहिला डोस - १० लाख ७ हजार ५४६

• दुसरा डोस - ४ लाख ६५ हजार ३०