अकोला : डॉ. पंजाबराव देशमुख कृषी विद्यापीठांतर्गत येणाऱ्या कृषी महाविद्यालय अकोला येथील चतुर्थ वर्षाचे विद्यार्थी सेंद्रिय शेतीचे धडे गिरवत आहेत. येथील विद्यार्थ्यांनी विद्यापीठाच्या गहू पिकातील तणनियंत्रण केले व पालक, मेथी, गवार, राजगिरा, इत्यादी भाजीपाला पिकांची लागवड केली आहे. सेंद्रिय पद्धतीने हा भाजीपाला पिकवून त्याची विक्री सुद्धा हे विद्यार्थीच करणार आहेत.

स्वतःच्या गावातील शेतकऱ्यांना सेंद्रिय शेती विषयक मार्गदर्शन करू तसेच स्वतःही सेंद्रिय पद्धतीने भाजापीला पिकवून त्याची विक्री करत सेंद्रिय शेतीमध्ये एक नवी ओळख निर्माण करू, असा निश्‍चय येथील विद्यार्थ्यांनी केला आहे. महाविद्यालयातील एक विद्यार्थी गोपाल नरसिंग उगले यानेसुद्धा जैविक शेती मार्गदर्शक म्हणून ओळख निर्माण केली आहे. गेल्या दोन वर्षापासून हा विद्यार्थी शेतकऱ्यांना जैविक शेतीबाबत मार्गदर्शन करत असून, त्यांना सेंद्रिय शेती करण्यासाठी प्रवृत्त करणार आहे.

हल्ली पिकांवर आणि शेतीवर वाढत चाललेला रासायनिक खतांचा व औषधांचा भडीमार वापर थांबला पाहिजे. यासाठी कृषीचे विद्यार्थी हा उपक्रम त्यांच्या स्वतःच्या गावांमध्ये पार पाडणार आहेत. या उपक्रमाचे सर्वच स्तरावरून कौतूक होत आहे. या उपक्रमामध्ये प्रामुख्याने शेतकऱ्यांचा उत्पादन खर्च कमी झाला पाहिजे, शेतकऱ्याला शेतीमध्ये अधिक फायदा होऊन शेतीमध्ये अधिक गोडी तयार झाली पाहिजे, यासाठी चौथ्या वर्षाच्या विद्यार्थ्यांना जिवाणू खते (बायो फर्टीलायझर), रायझोबियम, पी.एस.बी., अझोटोबॅक्टर, हुमिक एसिड, मायकोरायझा, ट्रायकोडर्मा, निंबोळी अर्क, दशपर्णी अर्क, नैसर्गिक तणनाशके, गांडूळ खत, एच.एन.पी.व्ही., कंपोस्ट खत इत्यादी स्वतः कसे तयार करावे आणि शेतीमध्ये सेंद्रिय पदार्थाचा वापर कसा करावा, याबाबत मार्गदर्शन दिले जात आहे.

डॉ. पंजाबराव देशमुख कृषी विद्यापीठाचे कुलगुरू डॉ. विलास भाले यांच्या प्रोत्साहनाने व कृषी महाविद्यालय अकोलाचे सहयोगी अधिष्ठाता डॉ. एस.एस. माने यांच्या मार्गदर्शनखाली हा उपक्रम सुरू आहे. डॉ. मंगला गणबहादूर, विरेंद्रसिंह ठाकूर, डॉ. गणेश भगत, डॉ. दिलीप धुले, डॉ. गणवीर, डॉ.सीमा नेमाडे, डॉ. गोदावरी गायकवाड, डॉ. हरणे आणि अनंता परिहार हे हा उपक्रम राबाविण्यासाठी संपूर्ण मदत व मार्गदर्शन करीत आहेत.